Выніковыя дакументы
Чацвёртага з’езда беларусаў свету
МГА “ЗБС “Бацькаўшчына”

1. Праграма “Беларусы замежжа” (2005 – 2009 гг.);
2. Зварот да суайчыннікаў “Беларусь – для дыяспары, дыяспара – для Беларусі”;
3. Рэзалюцыя “Пра беларускую мову”;
4. Дэкларацыя “Аб падтрымцы Акта незалежнасці Беларусі, прынятага Усебеларускім з’ездам 29 ліпеня 2000 г. у Мінску”;
5. Рэзалюцыя “МГА “ЗБС “Бацькаўшчына” – правамоцны прадстаўнік інтарэсаў сусветнай беларускай супольнасці”;
6. Зварот “Аб Радыёстанцыі Deutsche Welle”;
7. Заява супраць перайменавання праспекта Ф. Скарыны;
8. Зварот да Урада і Нацыянальнага Сходу Рэспублікі Беларусь аб прыняцці закона “Аб беларускай дыяспары”.
9. Беларуская дыяспара. Сучасныя праблемы і перспектывы

Зварот да суайчыннікаў
“Беларусь – для дыяспары, дыяспара – для Беларусі”

ДАРАГІЯ СУАЙЧЫННІКІ!

Мы ўсе разам – хто нарадзіўся і жыве ў Беларусі, хто па волі лёсу апынуўся па-за межамі бацькаўшчыны – ёсць Народ Беларусі. Мы ўсе – адзін для аднаго, мы ўсе разам - для Беларусі, вольнай і незалежнай, дэмакратычнай і заможнай, роўнай сярод роўных у сусветнай супольнасці нацый.

Гісторыя Беларусі -- ад сівой даўніны да нашых дзён, як і гісторыя іншых краін і народаў, сведчыць: чым шчыльней сувязі, чым мацней пачуццё еднасці паміж бацькаўшчынай і дыяспарай, тым лепш для абодвух бакоў. Сувязяў і еднасці на ўсіх узроўнях – паміж сваякамі і роднымі, паміж грамадскімі аб’яднаннямі і дзяржаўнымі інстытуцыямі. Бацькаўшчына ўзбагачаецца сусветным вопытам, дасягненнямі і здабыткамі. Выхадцы з Беларусі – атрымліваюць павагу і прэферэнцыі за межамі сваёй радзімы, у краінах пражывання. Інтэлектуальныя здабыткі таленавітых сыноў і дачок Беларусі ўзбагачаюць скарбніцу сусветных дасягненняў -- у навуцы, культуры, палітыцы.
На жаль, гісторыя стасункаў афіцыйнай Беларусі з дыяспарай ведае змрочныя перыяды, калі кіруючыя колы падзялялі дыяспару на сваіх і чужых, правакавалі варожасць і расколы, узводзілі памежныя жалезныя заслоны.

На жаль, рэцыдывы такой палітыкі наглядаюцца і сёння. Больш таго, яны ўзмацняюцца.
Мы павінны, і гэта ў нашых магчымасцях, стрымаць націск заганных традыцый, паспрыяць узмацненню сувязяў паміж бацькаўшчынай і дыяспарай.
На ўсіх узроўнях і на абодвух гістарычных накірунках – на Захад і на Усход.
Найперш на міжасобасным узроўні.
Родзічы, сябрукі, знаёмыя!
• Не дайце адлегласці і часу перарваць, прыпыніць вашы сувязі, пішыце адзін аднаму рэгулярна і часцей. Расказвайце пра сваё жыццё, падзеі ў Беларусі і краінах пражывання.
Суайчыннікі за мяжой!
• Інфармуйце сваіх замежных сяброў і знаёмых аб сітуацыі ў Беларусі, да якога б асяродку яны не належылі – у сферы эканомікі, бізнеса, культуры, палітыкі.
• Гуртуйцеся ў суполкі па інтэрэсах, усталёўвайце цесныя і пастаянныя сувязі паміж сабой, уступайце ў суполкі МГА “ЗБС “Бацькаўшчына”. З гэтым заклікам мы звяртаемся асабліва да моладзі, якая нядаўна выехала за мяжу. Супольна лягчэй адаптавацца ў новых ўмовах, усталявацца на новым месцы і паспрыяць прагрэсіўным пераменам ў Беларусі.
Арганізаваныя суполкі дыяспары, аўтарытэтныя дзеячы краін пражывання!
• Выкарыстоўвайце свае сувязі з грамадскімі арганізацыямі, з вядомымі дзеячамі краін пражывання за мяжой дзеля падвышэння іх уплыву на дзяржаўныя інстытуцыі, на палітычныя колы сваіх краін у вызначэнні дакладнай і мэтанакіраванай палітыкі ў адносінах да Беларусі.
• Дапамагайце пашырэнню кантактаў, абмену інфармацыяй паміж роднаснымі прафесійнымі і грамадскімі арганізацыямі, правядзенню імі сумесных мерапрыемстваў, абмену дэлегацыямі.

Чацвёрты з’езд беларусаў свету МГА “ЗБС “Бацькаўшчына”
16-17 ліпеня 2005 г., г.Мінск