N.R.M. ужывую на Netradio.by

29 траўня адбудзецца калі не грандыёзная, то прынамсі цікавая падзея ў беларускай музыцы – вялікі акустычны канцэрт гурта N.R.M. Тым, хто з нейкіх прычынаў не здолее трапіць на гэтую імпрэзу першая прафесійная радыёстанцыя байнэту Netradio пры падтрымцы Тузіна Гітоў рыхтуе немалую прыемнасць – жывую трансляцыю гэтага канцэрту на сваім канале Netradio Live.

А ўжо 21 траўня на іншым канале - Netradio Hot цягам цэлай гадзіны з 23:00 будуць гучаць выключна песні N.R.M.

Вялікі акустычны канцэрт гурта N.R.M. мае адбыцца 29 траўня ў КЗ “Мінск”у 19:00. З гэтага ж часу пачнецца яго жывая трансляцыя на Netradio.by. “Мы вельмі зацікаўленыя ў трансляцыі жывых канцэртаў нашых рок-зорак, - тлумачыць кіраўнік гэтага праекту Глеб Марозаў. – Таму зразумела, што не маглі абысці ўвагаю гэтую цікавую імпрэзу”.

Netradio мела трансляваць 26 траўня і цікавы фольк-фэст “World Music Tree” з Віцебску. Але адны з яго ўдзельнікаў – гурт “Троіца” – выступілі супраць он-лайну. “Мы маем не вельмі станоўчы досвед падобных трансляцыяў у Польшчы, таму лічым, што да такой падзеі трэба рыхтавацца адмыслова і грунтоўна”, - патлумачылі Тузіну Гітоў сваю адмову ўдзельнікі этна-трыё.

Што да N.R.M., то музыкі з радасцю пагадзіліся на жывую трансляцыю з КЗ “Мінск”. “Чым болей нас пачуюць, тым лепей”, - кажуць музыкі.

Тым часам ужо 21 траўня на канале Netradio Hot цягам гадзіны – з 23:00 да 0:00 – у межах аўтарскай праграмы Сяргея Будкіна “Беларуская раскладка” будуць гучаць выключна творы гурта Лявона Вольскага – галоўныя гіты, рарытэтныя запісы, іхнія каверы ды каверы на іх.

Паводле “Нашай Нівы”