Артура Фінкевіча завочна асудзілі

15 траўня 2008 году суд Першамайскага раёну ЗАВОЧНА асудзіў намесніка старшыні Маладога Фронту Артура Фінкевіча на адміністрацыйны арышт тэрмінам на 7 сутак.

Падставаю да гэтага прысуду стаў пратакол, складзены супрацоўнікамі Першамайскага РАУС пасьля затрыманьня Фінкевіча каля Нацыянальнай бібліятэкі 1 траўня, дзе ён браў удзел у мірнай акцыі, прымеркаванай да Дня Працы. Супрацоўнікі РАУС абвінавацілі ўсіх затрыманых, у тым ліку Артура Фінкевіча, па ч.3 артыкулу 23.34 Кодэксу аб адміністрацыйных парушэннях (актыўны ўдзел у несанкцыянаваным мерапрыемстве), склалі на іх пратаколы і выпусцілі, узяўшы падпіску пра абавязак з’явіцца па першым патрабаванні.

Неабходна зазначыць, што аніводнага разу пасля 1 траўня Артура ніхто не выклікаў ні ў суд, ні ў РАУС. Пры гэтым, паводле ч.1 артыкулу 11.4 Працэсуальна-адміністратыўнага Кодэксу, суд ня мае права разглядаць справу ў адсутнасці абвінавачваемага, акрамя як у сітуацыях, калі абвінавачваемы прызнаў сваю вінаватасць альбо неаднаразова ігнараваў позвы суду. Усе затрыманыя на акцыі 1 траўня адмаўлялі сваю вінаватасць, патлумачыўшы, што з’яўляюцца сябрамі Беларускага Кангрэсу дэмакратычных прафсаюзаў, пацвердзіўшы сваё сяброўства прафсаюзнымі білетамі. Аніводнага з затрыманых на акцыі не выклікалі ні ў суд, ні ў РАУС пасля 1 траўня.

Тым ня менш, 15 траўня адбылося паседжанне, пра якое ня ведаў ні Фінкевіч, ні адвакат, які мусіў абараняць Артура ў судзе. Пра прысуд самому Артуру стала вядома толькі 19-га траўня, калі яму дадому патэлефанаваў супрацоўнік Першамайскага РАУС г.Менску і пацікавіўся, як яго знайсці. Супрацоўнік РАУС паведаміў маці Артура, што судом Першамайскага РАУС ейны сын асуджаны да арышту і РАУС збіраецца аб’явіць яго ў адміністрацыйны вышук.

Як стала вядома, рашэньне аб адміністрацыйным пакараньні прыняў суддзя Першамайскага суду Гарбатоўскі. Цытуем пастанову суду: “Фінькевіча Артура Ўладзіміравіча прысудзіць да адміністрацыйнага спагнаньня ў выглядзе арышту тэрмінам на сем сутак. Тэрмін арышту адлічваць з моманту яго затрыманьня”.

Адпаведна Кодэксу аб адміністрацыйных правапарушэньнях, рашэньне суду Першамайскага раёну супярэчыць закону і з’яўляецца неправамоцным.

Відавочна, што дадзенае рашэнне было прымеркаванае да ад’езду Фінькевіча у г.Порту (Партугалія), дзе ён мае узяць удзел у з’ездзе YEPP (Youth of the European People's Party – Моладзь Еўрапейскае Народнае партыі), які пройдзе там 22-25 траўня 2008 году. Такім чынам беларускія спецслужбы чарговы раз спрабавалі перашкодзіць міжнароднае дзейнасці Маладога Фронту.

Нягледзячы на створаныя перашкоды, Артур Фінкевіч здолеў выехаць з Беларусі. Бліжэйшым часам ён возьме ўдзел ў запланаваным мерапрыемстве.

Артур пракаментаваў дадзеную сітуацыю па тэлефоне прэсавай службе МФ:

“Я ўпэўнены, што дадзеная сітуацыя цалкам відавочная. 13 траўня мяне спрабавалі не прапусьціць праз беларускую мяжу, калі я ехаў у Вільню на падпісанне пагаднення з Маладымі Хрысціянскімі дэмакратамі Літвы. Тады мы дзякуючы разуменню памежнікаў, здолелі даехаць да Вільні. Тым ня менш, па дарозе дадому з Вільні мне паставілі штамп, што я часова пазбаўлены права выяджаць з Беларусі. На наступны дзень, калі я наведаў аддзел па грамадзянству і міграцыі, мне прынеслі прабачэнне і патлумачылі, што я трапіў у базу выпадкова. А літаральна праз тыдзень сітуацыя паўтарылася – і гэта пацвярджае, што беларускія спецслужбы адмыслова працуюць над тым, каб перашкодзіць міжнароднае дзейнасці Маладога Фронту.

Але я запэўніваю, што працу Маладога Фронту ніхто ня спыніць, ні непасрэдна ў Беларусі, ні на міжнароднай арэне. Рэжым ужо спрабаваў спыніць дзейнасць нашае арганізацыі з дапамогаю крымінальнага кодэксу, але таварышы пралічыліся. Дык няхай яны ня думаюць, што сваім дробязным бяспраўем спыняць моладзевы супраціў.

Моладзь сталее, бярэ на сябе адказнасць ва ўсіх сферах грамадска-палітычнага жыцця Беларусі, і я перакананы, што нашае пакаленне вельмі хутка спыніць тое беззаконне, якое пакуль яшчэ творыцца на Беларусі!”

Паводле сайта “Малады Фронт”