“Тарзан” па-беларуску на DVD

Выйшаў у свет дзіцячы мультфільм “Тарзан”, дубляваны на беларускую мову.

Адметнасць беларускага “Тарзана” ў тым, што песні на ангельскай мове пераспяваў па-беларуску Зміцер Вайцюшкевіч.

Кіраўнік праекту Алесь Квіткевіч падкрэслівае, што “Тарзан” па-беларуску – першы з запланаванай серыі.

Праект створаны супольна творчым згуртаваннем “Дзіўноты і памароцтвы” ды фірмай “Сотвар”. У ранейшыя гады ў серыі ўжо выходзілі дубляваныя на беларускую мову ўсясветныя хіты дзіцячай анімацыі: “Русалачка”, “Аліса ў краіне цудаў”, “Прыгоды Віні-Пыха” ды іншыя. Але стужкі выдаваліся на касетах. Далей Алесь Квіткевіч:

“Мы вырашылі да кожнага старога мультфільму, які быў у свой час агучаны на беларускую мову, дадаць па адным новым, і перавыдаць усё гэта на якасных лічбавых носьбітах”.

Пра бліжэйшыя планы: “Наступныя будуць “Карпарацыя монстраў” плюс “Шрэк-1” на адным дыску, а потым будуць “Самаходзікі” плюс “Гісторыя цацак”.

Мультфільм “Тарзан-2” выйшаў у студыі “Уолта Дыснэя” у 2005 годзе. Гэта гісторыя маленькага хлопчыка, якога выхавалі жывёлы і які стаўся супергероям джунгляў.

Алесь Квіткевіч працягвае: “Гэта абсалютна цудоўная анімацыйная інтэрпрэтацыя кніжкі сусветна вядомага пісьменніка Эдгара Райса Бэроўза – класікі дзіцячай літаратуры”.

Паводле Алеся Квіткевіча, дыск з “Тарзанам” ужо можна знайсці на кніжным кірмашы “Белэкспа”, што на вуліцы Янкі Купалы, 27, а таксама ў незалежных распаўсюднікаў.

Паводле “Радыё Свабода”