Мінадукацыі вяртае ў ВНУ беларускую мову

Міністэрства адукацыі рэкамендавала ў новым навучальным годзе ва ўсіх ВНУ краіны арганізаваць выкладанне абавязковага курсу прафесійнай лексікі беларускай мовы. Пра гэта гаворыцца ў адказе намесніка міністра адукацыі Казіміра Фарыно ад 13 траўня на ліст старшыні грамадзкага аб’яднання «Таварыства беларускай мовы імя Францішка Скарыны».

У сваім адказе намеснік міністра, у прыватнасці, паведаміў, што лісты з рэкамендацыямі такога зместу былі накіраваны ў сакавіку рэспубліканскім органам дзяржаўнага кіравання, якія маюць вышэйшыя навучальныя ўстановы, а таксама кіраўнікам ВНУ Міністэрства адукацыі.

Апрача таго, як зазначае сп. Фарыно, пагадзіўшыся з прапановай старшыні ТБМ, намеснік міністра накіраваў лісты дырэктару ўнітарнага прадпрыемства «Мінская фабрыка каляровага друку» і ў Міністэрства інфармацыі. У лістах утрымліваецца просьба «перагледзець афармленне вокладак вучнёўскіх сшыткаў, упрыгожыўшы іх выявамі раслін і архітэктурных помнікаў Беларусі, а інфармацыю, змешчаную на вокладках, даваць на беларускай мове з улікам патрэбаў школ краіны ў такіх выданнях».

У інтэрвію БелаПАН Алег Трусаў ад імя ТБМ выказаў падзяку кіраўніцтву Мінадукацыі, якое звярнула ўвагу на шматлікія просьбы грамадзян і ўвяло курс прафесійнай лексікі беларускай мовы ў якасці абавязковага ва ўсіх ВНУ краіны. Паводле слоў сп. Трусава, кіраўніцтва грамадзкага аб’яднання атрымала мноства тэлефонных паведамленняў ад выкладчыкаў ВНУ, якія выказалі ўдзячнасць за магчымасць выкладаньня гэтага курсу ў новым навучальным годзе.

«Хацелася б, каб чыноўнікі захавалі гэты курс у навучальных плянах ВНУ, бо ТБМ трэці год адстойвае яго выкладанне пасля ўвядзення новых адукацыйных стандартаў ва ўнівэрсітэтах краіны», — сказаў Алег Трусаў.

Паводле БелаПАН