"Магдэбургская Гародня" — першая кніга серыі "Гарадзенская бібліятэка"

У Гродне Гарадзенскім Рухам “За Свабоду” выдадзена манаграфія доктара гістарычных навук Юрыя Гардзеева "Магдэбургская Гародня (сацыяльная тапаграфія і маёмасныя адносіны ў 16—18 ст.)". Гэта першая кніга серыі "Гарадзенская бібліятэка", што выдаецца пад патранатам лідэра Руху “За Свабоду” Аляксандра Мілінкевіча. Кніга выйшла пры падтрымцы ўлад Вроцлава (Польшча), Міністэрства замежных спраў Польшчы, Польска-амерыканскага фонду Свабоды і Калегіума Усходняй Еўропы імя Яна Новака-Язераньскага (Польшча).

Багата ілюстраванае выданне прысвечана пытанням планавання і забудовы Гродна ў перыяд, калі горад карыстаўся Магдэбургскім правам (з 1496 года да апошніх дзён Рэчы Паспалітай у канцы XVIII стагоддзя); сацыяльнай тапаграфіі гродзенскіх вуліц і плошчаў; саслоўных і маёмасных адносін, а таксама сацыяльнай стратыграфіі і прафесійнай структуры горада.

Як зазначае ў прадмове да манаграфіі доктар гістарычных навук Аляксандр Краўцэвіч, кніга Ю.Гардзеева з'яўляецца першай у краіне працай, прысвечанай сацыятапаграфіі беларускага горада. Тапаграфія Гродна адлюстравала ў сабе "змяненне цывілізацыйнай арыентацыі Беларусі — пераход ад візантыйскай да заходнееўрапейскай традыцыі". Праявай гэтага стала ўзвядзенне ў аддаленасці ад замка новага канкурэнтнага гарадскога цэнтра — рынку з ратушай. "Шматгадовая скрупулёзная праца дазволіла Юрыю Гардзееву стварыць унікальную для Беларусі кнігу, у якой з усёй магчымай паўнатой апісана развіццё горада як матэрыяльнага аб'екта з уваходам у гісторыю амаль кожнага зямельнага ўчастка", — гаворыцца ў прадмове. А.Краўцэвіч называе кнігу ўзорам высокага ўзроўню вывучэння "еўрапейскай гісторыі беларускага горада".

У інтэрв'ю БелаПАН каардынатар серыі Павел Мажэйка зазначыў, што серыя "Гарадзенская бібліятэка" прысвячаецца "таму Гродна, якім можна ганарыцца". "Серыя будзе знаёміць з гісторыяй горада, свабоднай ад ідэалагічнай хлусні, з мастацкімі творамі і навуковымі працамі гродзенцаў, якія ўнеслі значны ўклад у сусветную культуру. Кнігі серыі будуць распавядаць аб людзях-стваральніках, якія супрацьстаялі Герастратам ад улады розных часоў", — сказаў П.Мажэйка.

Выхадзец з Гродна Юрый Гардзееў — ад'юнкт Інстытута Расіі і Усходняй Еўропы Ягелонскага універсітэта (Кракаў). З'яўляецца аўтарам каля 70 публікацый, прысвечаных гісторыі беларускіх гарадоў, у тым ліку дзвюх кніг аб Гродна.