“Малітва да Вільні”

17 траўня а 19-й гадзіне з Вострае Брамы будзе ўпершыню прачытаная беларуская "Малітва да Вільні". У гэты час і ў гэтым месцы чакаецца незлічоная колькасць народу, што збярэцца з нагоды Дзён Найсвяцейшай Дзевы Марыі. Такім чынам будзе закладзеная традыцыя штогадовае беларускае малітвы да Вільні.

Малітва да Вільні

“Горад наш, які ёсць у нябёсах, нябёсы якога ёсць памяць пра пакутнікаў, творцаў, герояў: Антоні, Астах, Іаан, Скарына Францішак, Каліноўскі Кастусь, ксёндз Станкевіч Адам, і Луцкевічы, і Аляхновіч...

Горад наш, які ёсць на зямлі, а зямлёю якога ёсць мы; хто належыць табе і цябе сатварае, табою сатвораны будзе.

Дай нам мудрасці, Горад, каб вызначыць межы і месца сваё беларускае роўна з табою, на адлегласці мары прасветлай.

Дай нам голасу чыстага, славіць імя тваё, Горад, тут, цяпер, і далёка, і блізка, і заўтра, і потым, і вечна,

Вільня”.

Паводле газеты “Свабода” (Літва)