Каардынатар
“Белсату” дапытаны ў пракуратуры
Допыт тычыўся сатырычных мультфільмаў пра
беларускую ўладу, з нагоды з’яўлення якіх была распачатая крымінальная справа аб
знявазе гонару і годнасці прэзідэнта РБ. Пра абставіны сённяшняга допыту Эдуард
Мельнікаў распавёў у інтэрвію нашаму карэспандэнту.
Мельнікаў: “Гэта - працяг таго "сюжэту",
які пачаўся колькі дзён таму, калі ў шмат якіх кватэрах журналістаў рабіліся
ператрусы, і шмат якіх журналістаў звязвалі з дзейнасцю замежных радыёстанцый і
кампаній. Я маю на ўвазе тую старую крымінальную справу 2005 г. ў сувязі з
"анімацыямі". З гэтай нагоды ў мяне на кватэры быў ператрус. І мне сказалі ў
КДБ, што я праходжу як сведка па гэтай крымінальнай справе. Быццам бы я маю
дачыненне да гэтых так званых "мульцікаў". Сёння выклікалі, каб задаць гэтае
пытанне ўжо вуснамі следчага па асабліва важных справах мінскай пракуратуры
Шабана. Ён спытаў, ці маю я дачыненне да стварэння гэтых анімацый, ці ведаю
людзей, якія іх стваралі? Ну, што я мог адказаць? Канешне, ня ведаю. Таксама ён
спытаў, ці маю я дачыненне да каналу “Белсат”. Гэта я пацвердзіў, таму што маю
дачыненне да каналу “Белсат”. Скажам гэтак, мяне называюць каардынатарам каналу
ў Беларусі. Я ня ведаю. наколькі гэта адпавядае рэчаіснасці. Але я сказаў, што я
займаюся справаю рэгістрацыі прадстаўніцтва тэлеканалу “Белсат” у Беларусі. Таму
што лічу, што становішча, якое зараз назіраецца, ненармальнае. Таму што трэба,
каб журналісты - тэлежурналісты, радыёжурналісты, усе -- працавалі легальна, з
акрэдытацыяй, ад імя прадстаўніцтва той ці іншай кампаніі ў Беларусі. І таму
будзем прыкладаць усе намаганні, каб прадстаўніцтва такое было
зарэгістравана.
Раней ворганы пракуратуры і КДБ ужо
дапыталі шэраг журналістаў, што трапілі пад ператрусы 27–28 сакавіка. Усіх іх
дапытвалі ў якасці сведак па крымінальнай справе аб паклёпе на прэзідэнта ў
дачыненні да Алега Мініча, Паўла Марозава і Андрэя Абозава. Ва ўсіх пыталіся пра
палітычныя мультфільмы «Трэцяга шляху» і пра дзейнасць тэлеканала «Белсат». У
жніўні 2005 г. пракуратура г. Мінска завяла крымінальную справу па факце
распаўсюду ў інтэрнэце мультфільмаў, якія «зневажаюць гонар і годнасць
прэзідэнта Беларусі» (арт. 367 ч 1). Нагодай сталі мультфільмы сатырычнага
характару. Спачатку ў межах крымінальнай справы ў якасці сведак былі дапытаныя
адміністратар сайту грамадскай ініцыятывы «Трэці шлях» Андрэй Абозаў і
каардынатар праекту Павел Марозаў. Супрацоўнікі КДБ правялі ў іх кватэрах
ператрусы, забраўшы камп’ютарную тэхніку. У хуткім часе пасля гэтага А.Абозаў,
П.Марозаў і яшчэ адзін падазраваны — А. Мініч — пакінулі межы
Беларусі.
Паводле “Радыё
Свабода”
| 
