Фэст "Будзьма дударамі!"
пачаўся ў Мінску
24 красавіка на малой сцэне
канцэртнай залі «Мінск» пачаўся сёмы міжнародны фестываль «Дударскі фэст». У ім
бяруць удзел дудары з Украіны, Расеі, Польшчы, Літвы, Эстоніі, Балгарыі і Новай
Зеландыі. Фестываль праходзіць пад лозунгам "Будзьма дударамі!" Ён прымеркаваны
да Вялікадня. Распачаў фэст музыка, які цягам многіх гадоў дапамагае адраджэнню
дуды, самы стары дудар Беларусі Уладзімір Пузыня:
“Адраджэнне ідзе. Мы тут
без сцягоў нашых, без “Пагоні”. Гэта голас нашых продкаў. Гэта галасы
дзядоў-прадзедаў. Гэты гук – як зямля гудзіць. І няхай яна гудзіць доўга, на
стагоддзі”.
Пасля спадара Пузыні
выступіў самы маленькі ўдзельнік фестывалю сямігадовы Павал
Макоўскі.
Адзін з арганізатараў
імпрэзы Зміцер Сасноўскі сказаў, што дуда настолькі запісана ў беларускую
культуру і гісторыю, што заканамерна вяртае сваё імя. А Беларусь становіцца
цэнтрам дударскай культуры ва Усходняй Еўропе. Беларускія майстры вырабляюць ужо
ня толькі беларускія дуды, але і шведскія, нямецкія, шатландскія. У Мінску
ўтвораны дударскі клуб, які аб’ядноўвае 52 сяброў. Дзейнічае дударскае
братэрства святога Васіля. Рыхтуецца да выдання часопіс “Дудар”.
А сёлетні фестываль
працягнецца чатыры дні – у нядзелю завершыцца дударскай вечарынай ў клубе
“Катакомбы”. Зміцер Сасноўскі распавёў: “Павялічана геаграфія фэсту намнога.
Больш дзяўчынак граюць на дудах. Вельмі адметны фэст тым, што многія дудары і
майстры дасягнулі новых узроўняў, зрабілі новыя дуды, новыя рэканструкцыі.
Зроблены яшчэ некалькі відаў беларускіх дудаў”.
У фэсце бярэ ўдзел
дудар-беларус з Новай Зеландыі Андрэй Мароз. Ён будзе граць на шатландскай
дудзе. “Я два гады адсутнічаў у Беларусі і тут столькі здарылася, столькі
маладых людзей гэтым займаюцца і гэта цікава. У кожнага свае ідэі, задумкі. І
яны імкнуцца іх неяк укласці ў свае інструменты, у музыку, якую яны граюць. Мне
гэта падабаецца. Я граю на шатландскай дудзе – гэта больш вайсковы інструмент.
Яна больш гучная. Яна мае больш высокі гук і яна ўздымае людзей на нейкія
ваярскія справы”.
Сярод гледачоў Марына:
“Вельмі падабаецца дуда, валынка. І тое, што ўсё ж трэба захоўваць нашу
культуру. Не кожны час такое можна пачуць”.
Паводле арганізатараў,
фестываль прымеркаваны да Вялікадня. Ён нагадвае пра беларускі абрад
“валачобніцтва”, пад час якога адбываецца абыход дамоў з дудой і
спевамі.
Паводле «Радыё
Рацыя»
|