“Бацькаўшчына” працягвае канцэрты прымеркаваныя да “Года беларускай Дзяржаўнасці”

Згуртаванне беларусаў свету “Бацькаўшчына” працягвае сваю дзейнасць па папулярызацыі БНР у межах “Года беларускай Дзяржаўнасці”.

Так 18 красавіка ў Гародні адбылася вечарына беларускага барда Зміцера Бартосіка прымеркаваная да 90-годдзя БНР. Сваім слухачам З. Бартосік прэзентаваў свой новы альбом “Дарога на Вільню”, які выйшаў ў красавіку 2008 і быў напісаны падчас віленскага жыцця барда. Напачатку канцэрта адбылася прэзентацыя кнігі мастацтвазнаўца Сяргея Харэўскага “Гісторыя мастацтва і дойлідства Беларусі”.

“Дарога на Вільню” – гэта альбом гістарычных балад і патрыятычнай лірыкі. Закранем некалькі самых яскравых балад гэтага альбому. “Вільня, 1919” распавядае пра перыяд калі горад у 1919 годзе пераходзіў то рускім, то палякам, то літоўцам, пра змены сцягоў і пазіцый, пра паламаныя лёс. “Горадня, 1795” – дыялог двух расійскіх вайскоўцаў, якія едуць у абозе рускага генерала Суворава і займаюць Гародню. Седзячы на гэтым абозе яны спрачаюцца пра тое, што гэта за горад, што будзе з краем і наколькі гэтыя падзелы патрэбны. “Дарога на Вільню” – прысвечана Старавіленскаму тракту, свае асаблівая хвала гэтаму шляху. Як храмы бываюць намоленыя, так і гэту дарогу можна параўнаць з такім храмам, бо вельмі шмат беларусаў ішло па гэтаму тракту памаліцца “Вострабрамскай маці Божай”, абаронцы ўсіх беларусаў, у Вільню.

Запланаваны і наступныя выступы Зміцера Бартосіка з прэзентацыяй свайго новага альбома. 3 траўня адбудуцца канцэрты ў Нясвіжы і Баранавічах, а 4 траўня ў Слоніме.

Інфармацыйны цэнтр МГА “ЗБС “Бацькаўшчына”