Мілінкевіч патрабуе вызваліць Алеся Марачкіна

Управа МГА “Згуртаванне беларусаў свету “Бацькаўшчына” распаўсюдзіла заяву ў якой выказвае абурэнне затрыманнем і асуджэннем на пяць сутак адміністратыўнага арышту кіраўніка Згуртавання Аляксея Марачкіна. Лідэр Руху "За Свабоду" далучаецца да заявы.

“Расцэньваем гэтыя дзеянні як парушэнні маральных і юрыдычных нормаў і патрабуем неадкладна вызваліць Аляксея Марачкіна”, – гаворыцца ў заяве МГА “ЗБС “Бацькаўшчына”.

Аляксандр Мілінкевіч далучаецца да патрабавання вызваліць вядомага беларускага мастака і лічыць ціск з боку улады на актывістаў напярэдадні святкавання Дня Волі абсалютна непрымальным для еўрапейскай краіны.

Нагадаем, мастак і грамадскі дзеяч Алесь Марачкін быў затрыманы ва ўласнай майстэрні напярэдадні Дня Волі, 24 сакавіка, увечары. Аднаго з ветэранаў адраджэнскага руху ў Беларусі абвінавачваюць у лаянцы каля будынку Цэнтральнага РАУС г.Мінска.

25/03/08