Юрыст напісаў кнігу пра Забэйду-Суміцкага

Мноства навуковых кніжак напісана ненавукоўцамі, мноства перакладаў зроблена людзьмі, якія не скончвалі факультэт замежных моў.

Гэтаксама і з гэтай кніжкай пра Міхася Забэйду-Суміцкага «Песняй даваў людзям радасць», выдадзеную ў серыі «Нашы славутыя землякі». Такая кніга пабачыла свет толькі цяпер, праз 26 гадоў пасля смерці Забэйды. І напісаў яе не музыказнаўца, а юрыст з Баранавічаў Алесь Горбач.

«Я стаўся сучаснікам, нават сваяком Забэйды — ведаю гэтулькі падрабязнасцяў ягонага жыцця. Гэтак уцягнуўся ў працу над кнігай», — кажа аўтар.

Аўтар нарадзіўся на Ружанчшыне, у суседняй праз рэчку вёсцы ад той, дзе некалі жыў спявак. Старыя з ваколіц яшчэ памятаюць прыезды Забэйды на Бацькаўшчыну і бясплатныя выступы ў сялянскіх хатах. Каб адчуць асяроддзе, у якім жыў Забэйда, аўтар кнігі наведаў і Прагу, папрацаваў у чэшскіх архівах. А самае галоўнае, прывёз на магілу Забэйды жменьку пясочку з магілы маці спевака, якую ён вельмі любіў, але апошні раз бачыў падчас вайны.

У кнізе змешчаны жыццяпіс нашага спевака, пададзеныя невядомыя раней факты з бурлівага жыцця песняра. Сабранае ў адно цэлае тое, што драбінкамі друкавалася па розных выданнях. Шмат цікавых і не друкаваных раней фотаздымкаў.

Магчыма, некалі пасля з’явяцца больш ёмістыя даследаванні пра Забэйду-Суміцкага. Але спасылацца яны будуць на гэтую, першую, кнігу, што сталася яшчэ адной старонкай да вяртання нашага славутага спевака з небыцця.

Горбач А. Песняй даваў людзям радасць. — Мінск: Тэхналогія, 2007.

Паводле “Нашай Нівы”