Віншуем з юбілеем Міхася Чарняўскага – слыннага гісторыка Беларусі

“Згуртаванне беларусаў свету “Бацькаўшчына” віншуе з 70-годдзем вядомага беларускага археолага, гісторыка, грамадскага дзеяча Міхася Чарняўскага.

Міхась Міхайлавіч – узор адданасці Бацькаўшчыне, увасабленне найлепшых чалавечых якасцяў – сумленнасці, шчырасці, годнасці. Ён усю сваю дзейнасць прысвяціў Беларусі, яе гісторыі, нацыянальнаму адраджэнню. “Бацькаўшчына” мае за вялікі гонар супрацоўніцтва з гэтым выключным чалавекам.

Шаноўны спадар Міхась! Віншуем Вас з юбілеем і жадаем, каб Ваш нязгасны аптымізм і любоў да Радзімы запальвалі і надалей сэрцы іншы людзей! Здароўя, здзяйснення задумаў, шчасця!

Управа “ЗБС “Бацькаўшчына”

Чарняўскі Міхась, гісторык, археолаг, грамадскі дзеяч, нарадзіўся 7 сакавіка 1938 года ў в.Круці Вялейскага павета Віленскага ваяводства (зараз Мядзельскі р-н Мінскай вобл.). У 1962–1974 удзельнік клубу вальнадумнай інтэлектуальнай інтэлігенцыі “Акадэмічны асяродак”, з’яўляўся адным з арганізатараў клуба, якія бачылі сваё прызначэнне ў зборы і трансляцыі інфармацыі аб беларускай нацыянальнай і дэмакратычнай традыцыях. З 1966 па 2007 гады працаваў у Акадэміі Навук РБ. Браў актыўны ўдзел у дэмакратычным руху: адзін са стваральнікаў БНФ, а пазней разам з Міхасём Ткачовым – Беларускай Сацыял-Дэмакратычнай Грамады. Міхась Чарняўскі – адзін з выбітных грамадска-палітычных дзеячаў Беларусі. Зараз сп. Міхась з’яўляецца адным з кіраўнікоў руху “Ветэраны беларускага Адраджэння”. З’яўляецца аўтарам шматлікіх кніг, артыкулаў па гісторыі старажытнай Беларусі.