Аргкамітэт звярнуўся да мэра Мінска дзеля ўшанавання памятных мясцінаў, звязаных з утварэннем БНР

У канцы лютага сустаршыні Агульнанацыянальнага аргкамітэту па святкаванні 90-х угодкаў БНР, вядомыя дзеячы Беларусі Генадзь Бураўкін, Радзім Гарэцкі, Аляксей Марачкін падалі заяву мэру горада Мінска Міхаілу Паўлаву. Заява прысвечана мемарыялізацыі мясцін, звязаных з утварэннем Беларускай Народнай Рэспублікі. “25 сакавіка 1918 года Рада БНР III-й Устаўной граматай абвясціла Беларусь вольнай і незалежнай дзяржавай. Стварэнне Беларускай Народнай Рэспублікі было заканамерным этапам у развіцці нацыянальна-вызвольнага руху ў Беларусі напачатку XX стагоддзя. БНР прызналі Украіна, Турцыя, Фінляндыя, Аўстрыя, Чэхіі і Славакіі, Літва, Эстонія, Латвія, Польшча, Арменія, Грузія. У гістарычным кантэксце ўтварэнне БССР ёсць вынік змагання Ураду БНР за незалежнасць”, – кажуць дзеячы ў заяве. Да мясцінаў звязаных з абвяшчэннем БНР адносяцца:

I. Тэатр імя Янкі Купалы, у залі якога ў снежні 1917 года праходзіў Усебеларускі Кангрэс (з’езд) палітычных сілаў.
II. Музычны ліцэй (пл. Свабоды, 7), дзе ў 1918 г. у былой рэзідэнцыі расійскіх губернатараў была прынятая Першая Устаўная грамата БНР.
III. Будынак № 9 па вул. Валадарскага, што на рагу з праспектам Незалежнасці, дзе 25.03.1918 г. Радай БНР была прынятая Трэцяя Устаўная грамата.
IV. Рэспубліканскі дом працаўнікоў мастацтва на пр. Незалежнасці, 26 (былая вул. Захар’еўская — Юбілейны дом), дзе з 17 жніўня 1918 г. працавала Рада БНР.

У выпадку адмовы з боку дзяржаўны органаў, Аргкамітэт гатовы распачаць збор подпісаў грамадзян у падтрымку ініцыятывы.

Інфармацыйны цэнтр МГА “ЗБС “Бацькаўшчына”