Ніна Шыдлоўская: “Казуліна вызваляць датэрмінова, але не 28 лютага”

Беларускія ўлады ў выніку будуць змушаныя датэрмінова вызваліць экс-кандыдата ў прэзідэнты Аляксандра Казуліна, але адбудзецца гэта не 28 лютага. Такое меркаванне выказала АФН былая прэс-сакратарка Казуліна, намесніца старшыні МГА «Бацькаўшчына», Ніна Шыдлоўская.

«Прагназаваць складана, вельмі», – сказаў яна, кажучы пра магчымасць вызвалення палітвязня адразу пасля заканчэння трохдзённага водпуску, які беларускія ўлады далі палітыку на пахаванне сваёй жонкі. «Мне здаецца, што 28 лютага Казулін усё ж вернецца ў калонію», – лічыць Шыдлоўская.

«Улады не могуць сабе дазволіць "здацца" вось так – адразу, але неўзабаве будуць думаць, як «прыгожа», не выявіўшы слабасці, выйсці з гэтай сітуацыі», – растлумачыла суразмоўніца.

«Але думаю, што ў выніку Казуліна ўсё-ткі вызваляць датэрмінова», – выказала надзею Шыдлоўская.

Паводле яе слоў, надзею на датэрміновае вызваленне Казуліна далі самі ўлады, змушаныя пасля трохдзённай паўзы, а фактычна адмовы, усё-ткі даць палітыку кароткатэрміновы водпуск.

«Усе падводныя камяні, натуральна, не вядомыя. Але далей замоўчваць факт смерці жонкі палітыка Казуліна на афіцыйным узроўні было ўжо немагчыма», – адзначыла Шыдлоўская.

«Мне здаецца, што асяродак Лукашэнкі нарэшце зразумеў: калі Казуліна не адпусцяць развітацца з жонкай, зваротнай дарогі ўжо не будзе. Мяжа нялюдскасці і цынізму будзе пройдзеная, – падкрэсліла яна. – А гэта пагражае высокім чынам як унутры Беларусі, так і на міжнародным узроўні».

Паводле яе слоў, у значнай ступені на рашэнне аб падаванні Казуліну водпуску паўплывала і акцыя грамадзянскай салідарнасці, якая адбылася 25 лютага ў Мінску.

«Калі пры мінімальнай інфармацыі пра час збору на Кастрычніцкай плошчы сабраліся больш за тысячу чалавек, то ў наступныя дні такія акцыі набылі б масавы характар», – адзначыла суразмоўніца.

«А такое развіццё падзей ужо пагражае сур'ёзнымі наступствамі для ўлады», – склала Шыдлоўская.

Інфармацыя паводле “Хартыя 97”