Ці ўзмоцніцца ціск на польскую дыяспару ў Беларусі?

Як могуць падзеі ў Косаве паўплываць на сітуацыю ў Беларусі? На думку палітолага, Менск можа ўзмацніць ціск на польскую меншасць у сваёй краіне.

Палітоляг Аляксандар Фядута ў эфіры Свабоды выказаў меркаванне, што абвяшчэнне незалежнасці Косава дазволіць Менску лішні раз узмацніць ціск на польскую меншасць у Беларусі: “Пачынаецца, на мой погляд, перагляд межаў, якія ўтварыліся ў Еўропе. І калі адна са звышдзяржаваў, прыкладам, Злучаныя Штаты прызнаюць Косава, дык Расея прызнае, напрыклад, Абхазію”. “Беларусі, на першы погляд, гэта не датычыцца. Але паглядзіце, якую буйную кампанію ўзнялі беларускія ўлады супраць “карты паляка”. Тое, што ў гэтым выпадку ўзмацніцца ціск уладаў на польскую дыяспару ў Беларусі, у мяне няма ніякага сумневу”, – мяркуе Аляксандар Фядута.

Палітолагі Андрэй Фёдараў і Віталь Сіліцкі нязгодныя з гэтым. Сіліцкі: “Ня думаю, што адбудзецца больш, чым адбываецца цяпер. Фармальнага ці фактычнага ўзмацнення з боку Беларусі я не чакаю. Хіба некалькі “рытуальных скачак” каля сербскай амбасады, вось і ўсё. Што да польскага пытання, то антыпольская прапаганда ўзмацнілася калі? Калі Кваснеўскі быў прэзідэнтам, і ён адыгрываў важную ролю ў памаранчавай рэвалюцыі ва Украіне. Гэта напалохала беларускія ўлады, і пачаўся ціск на Саюз палякаў менавіта з гэтай прычыны: каб знізіць тут уплыў Польшчы. Зараз уплыў Польшчы ў Еўропе і так “ніжэй калена”, так што асаблівай нагоды змагацца з палякамі няма”.

Фёдараў: ”Я згодны з Віталем, тым больш што ў нас няма вялікіх раёнаў кампактнага пражывання палякаў, дзе яны складалі б большасць. Яны ў меншасці і ў Гарадзенскай, і ў Берасцейскай абласцях. Мяркую, у большай ступені актывізуецца антызаходняя прапаганда – антыамерыканская і антыеўрапейская. Маўляў, “з іхняга дазволу, пры іхняй падтрымцы падзялілі незалежную дзяржаву, нашых братоў сербаў” і гэтак далей”.

Віталь Цыганкоў

Інфармацыя Радыё “Свабода” (http://www.svaboda.org/)