Зроблены беларусамі свету полацкі абярэг пачаў вандроўку па краіне

Абярэг, які да 1145-годдзя роднага горада – старажытнага Полацка – стварылі сяброўкі клуба абрэзкавага шытва “Рошва”, зараз вандруе па Віцебшчыне.

Магчымасць пазнаёміцца з унікальным творам народнага мастацтва памерамі 27 на 3,5 метра, які cшыты з 400 вышываных, тканых, размаляваных і нават зробленых з каляровых каменьчыкаў абрэзкаў, ужо мелі віцебляне.

Наступная экспазіцыя, у якую уваходзяць яшчэ і лісты ад беларусаў розных краінаў свету, разгарнулася ва Ушачах. Потым маршрут выставы пройдзе па іншых гарадах і мястэчках вобласці.

Замежныя дэманстрацыі пачнуцца з суседняй Латвіі. Дзе яшчэ змогуць пабачыць знакаміты абярэг – вырашыцца пазней. Калі ўлічыць, што ў яго стварэнні, паводле кіраўніцы клубу “Рошва” Ніны Ярмук, прынялі ўдзел беларусы з балтыйскіх дзяржаў, Расіі, Балгарыі, Нямеччыны, Даніі – і гэтак далей ажно да Аргенціны, то шлях вандровак можа быць вялікім.

Паводле радыё “Рацыя” (www.racyja.com)