БНФ кліча людзей на Кастрычніцкую плошчу 12 снежня

Ідэю сабрацца напярэдадні візіту Пуціна на акцыю “За незалежную Беларусь” падаў намеснік старшыні Партыі БНФ Віктар Івашкевіч, падтрымалі старшыня партыі Лявон Баршчэўскі і яшчэ адзін намеснік Алесь Міхалевіч.

12 снежня а 18-й гадзіне ў сталіцы на Кастрычніцкай плошчы адбудзецца акцыя ў абарону незалежнасці Беларусі. Гэта было вырашана на з’ездзе Партыі БНФ.

Са словаў А. Міхалевіча, выходзіць на Плошчу трэба, бо сустрэча Уладзіміра Пуціна з Аляксандрам Лукашэнкам 13-14 снежня нясе пагрозу незалежнасці Беларусі, і голас грамадства мае прагучаць як засцярога.

Партыя БНФ заклікала ўсіх сяброў БНФ у Менску ўзяць у акцыі ўдзел.

Старшыня Партыі БНФ Л. Баршчэўскі звярнуўся да ўладаў з заклікам “не перашкаджаць мірнаму волевыяўленню беларускіх грамадзянаў”. У ягоным звароце да замежных дыпламатаў і журналістаў утрымліваецца просьба, каб тыя “пракантралявалі ступень цывілізаванасці паводзінаў беларускіх уладаў”.

Паводле “Нашай Нівы” (www.nn.by)