Выстава Купавы да юбілею Купалы і Коласа

“Постаці зямлі беларускай” – пад такой назвай ад 4 снежня ў мінскай галерэі “Артблік” працуе выстава мастака, сябра Вялікай Рады МГА “ЗБС “Бацькаўшчына” Міколы Купавы. Яна прысвечана 125-годдзю нараджэння Янкі Купалы і Якуба Коласа.

На вернісажы прадстаўлена каля 30 літаграфій і лінарытаў. Наведвальнікі адзначаюць, што ўсе творы прасякнуты цеплынёй і любоўю да роднага краю і песняроў беларускай зямлі.

“Я зрабіў падборку графічных прац, звязаных з жыццём і творчасцю славутых беларускіх літаратараў. Гэта гравюры, літаграфіі з выявамі краявідаў вёсак Вязынка Акінчыцы, Смольня, Віленскай чыгуначнай калоніі, дзе быў дом нявесты Коласа, Мікалаеўскай карчмы, дому Коласа ў Мінску ды іншыя працы”, – сказаў на адкрыцці выставы М. Купава.

Творы мастака сёлета тройчы экспанаваліся ў Беларусі: у вёсцы Баравая Дзяржынскага раёна, у Стоўбцах, у Менскай кавярні “Добрыя мыслі” і адзін раз у ЗША. Выстава ў “Артбліку” дапоўнена акварэльнымі творамі.

Павіншаваць мастака з адкрыццём выставы прыйшлі сын Якуба Коласа Міхась Міцкевіч, мастакі Алесь Шатэрнік і Міхась Карпук. Наведвальнікі галерэі змогуць пабачыць карціны да 24-га снежня.

Адрас галерэі “АртБлік” Мінск, вул. Някрасава, 11/34, тэлефон: (017) 232-95-53. Час працы: 11.00 — 19.00, выходныя: субота, нядзеля.

Паводле “Нашай Нівы” (www.nn.by)