Фільм пра падзеі “Плошчы”

У Мінску пройдзе прэм’ерны паказ фільму рэжысёра Сержука Патаранскага “У снягах драмае вясна”, які распавядае пра падзеі Мінскай вясны-2006, змаганне беларусаў за свабоду і справядлівасць на пляцы Каліноўскага.

7 снежня ў імпрэзе, якая пачнецца а 18-ай на сядзібе Партыі БНФ, акрамя самога аўтара кінастужкі, возьмуць ўдзел героі Плошчы і фільму.

Па словах аўтара стужкі, “тэма барацьбы за свабоду ва ўсіх яе выяўленнях і па сёння актуальна ў беларускім грамадстве. Мы маем палітычных вязняў, забароненыя газеты і часопісы, практыкуюцца спісы апальных рок-музыкаў… Таму я палічыў патрэбным шчыра аддзячыць тым людзям, што былі на Плошчы гэтыя пяць вольных дзён і далі нам спадзеў на перамены”.

У цэнтры ўвагі рэжысёра праблемы сацыяльнай адаптацыі юнакоў і дзяўчат. Паводле словаў С. Патаранскага, “моладзь – гэта новая краіна, гэта змены”.

Паводле “Хартыі’97” (www.charter97.org)