Улады не дазволілі пікеты ў дзень народзінаў палітвязня Казуліна

Улады не дазволілі правесці пікеты ў дзень народзінаў палітвязня Аляксандра Казуліна, які прыпадае на 25 лістапада. У Мінску акцыі былі запланаваныя на плошчы Бангалор, у парку імя 50-годдзя Кастрычніка і на вуліцы Арлоўскай.

Аднак Мінгарвыканкам паведаміў актывістам, што на плошчы і ў парку будзе праводзіцца рамонт, а на вуліцы Арлоўскай пікет замінаў бы руху пешаходаў і транспарту.

Тым не менш, сябры Беларускай сацыял-дэмакратычнай партыі (Грамада) – менавіта яе ачольвае А. Казулін – маюць намер прыйсці ў нядзелю на плошчу Бангалор і ў парк імя 50-годдзя Кастрычніка, каб праверыць, ці будуць там праводзіцца рамонтныя працы.

У выпадку, калі іх не будзе, яны збіраюцца падаваць у суд.

Тым часам у Гродне забаранілі пікеты ў падтрымку палітзняволеных. Каля 20 заявак падавалі сябры Беларускага Хельсінскага камітэту, Аб’яднанай грамадзянскай партыі і Партыі камуністаў беларускай. Акцыі планаваліся таксама на 25 лістапада.

Паводле БелаПАН, Радыё “Свабода” (www.svboda.org)
 і “Еўрапейскага радыё для Беларусі” (www.belradio.fm)