Генпракуратура настойвае на прысудзе Казуліну

Генеральная пракуратура адмовілася апратэстоўваць прысуд экс-кандыдату ў прэзідэнты Беларусі палітвязню Аляксандру Казуліну. Пра гэта абаронцу Аляксандра Казуліна паведамілі ў лісце з Генеральнай пракуратуры.

“У нас засталася апошняя магчымасць для пратэсту — наглядная скарга на імя старшыні Вярхоўнага Суду Валянціна Сукалы. Сёння такая скарга будзе адасланая. Калі і яе не задаволяць, мы будзем звяртацца ў міжнародныя судовыя інстанцыі”, — сказаў былы адвакат кандыдата ў прэзідэнты Ігар Рынкевіч.

Нагадаем, адвакат Зміцер Гарачка больш як два месяцы таму падаў скаргу ў пракуратуру з просьбай апратэставаць прысуд, які летась вынес Аляксандру Казуліну Маскоўскі раённы суд — пяць з паловай гады зняволення за арганізацыю масавых акцыяў пратэсту супраць фальшавання вынікаў прэзідэнцкіх выбараў 2006 г.

Аднак, як мяркуе генпракурор Пётра Міклашэвіч, прысуд быў законны. Раней рашэнне Маскоўскага райсуду пацвердзіў Мінскі гарадскі суд.

Паводле Радыё “Свабода” (www.svaboda.org)