Цімоха Вострыкава пахавалі пад бел-чырвона-белым сцягам

14 лістапада на могілках у вёсцы Раманавічы пад Гомелем пахавалі дзеяча беларускага нацыянальнага супраціву Цімоха Вострыкава.

У 1952 г. Вострыкаў дэсантаваўся ў Беларусі як упаўнаважаны прадстаўнік Рады Беларускай Народнай Рэспублікі, быў арыштаваны, 23 гады правёў у зняволенні. Пасля вызвалення жыў пад наглядам у Гомелі, у 90-я ўдзельнічаў у вулічных акцыях дэмакратычных сілаў у Мінску. Напісаў успаміны. Пражыў Вострыкаў 85 гадоў.

На пахаванні прысутнічалі некалькі дзесяткаў сяброў дэмакратычнага руху. Гомельскі актывіст Канстанцін Жукоўскі распавёў: “Было ад 20 да 30 чалавек. Атрымалася знянацку. Ён учора памёр у абед, а сёння ў 12 гадзін было пахаванне. З Мінску паспела толькі адна машына прыехаць, людзі вельмі прасілі, каб пачакалі. І сын быў, і цётка Ніна, якая яго даглядала. Яна ставілася да яго як да свайго роднага, бо яна яго пахавала побач з магілай свайго сына… У вялікі бел-чырвона-белы сцяг абгарнулі труну. Чаго ён вельмі хацеў, тое і адбылося”.

Сын Ілля, нягледзячы на тое, што вырас у гарадскім, пераважна рускамоўным асяродку, выдатна валодае роднай мовай: “У мяне за плячамі звычайная школа. Гэта ўсё дзякуючы майму бацьку, ён мяне навучыў нашай мове. Ён заўсёды змагаўся, ніколі не гаварыў па-руску. Ён змагаўся за сваю гісторыю, за свой народ. Ён колькі раз казаў: “Гісторыю майго існавання зразумее толькі той, хто пабываў у кіпцюрах КДБ”.

Чамусьці надпіс на шыльдзе, прымацаванай да крыжа, быў выкананы на рускай мове. Але дэмакратычныя актывісты вырашылі праз год усталяваць помнік з беларускім надпісам.

Паводле “Еўрапейскага радыё для Беларусі” (www.belradio.fm)
 і Радыё “Свабода” (www.svaboda.org)