Сваякі зніклых накіравалі ў пракуратуру “Абвінаваўчы акт”

Дакумент, які падрыхтавалі юрысты і сваякі зніклых апазіцыянераў, складае болей за дваццаць старонак.

Адзін з аўтараў “Абвінаваўчага акту”, вядомы праваабаронца Гары Паганяйла, патлумачыў: “Нашы высновы грунтуюцца на фактах, якія расследавалі амаль дзевяць гадоў. Ведаем пра прэзумпцыю невінаватасці, але выклалі нашае меркаванне пра вінаватых у знікненні Юрыя Захаранкі, Віктара Ганчара, Анатоля Красоўскага і Зміцера Завадскага і назвалі пэўныя прозвішчы. У пракуратуры з’явіўся яшчэ адзін шанец завяршыць следства. Але апошні. Сваякі зніклых папярэдзілі Генеральную пракуратуру, што болей да яе звяртацца не будуць. Усе будучыя звароты — толькі ў міжнародныя інстанцыі”.

Нагадаем, былы міністр унутраных справаў Юры Захаранка знік у траўні 1999 г. У верасні таго ж года невядомыя скралі дэпутата Віктара Ганчара і ягонага сябра бізнесоўца Анатоля Красоўскага. У 2000 г. знік аператар ОРТ Зміцер Завадскі.

Гэтыя справы дагэтуль не расследаваныя, лёс зніклых невядомы. Сваякі зніклых, беларуская апазіцыя і многія ў свеце мяркуюць, што да гэтых злачынстваў датычнае кіраўніцтва краіны.

Паводле Радыё “Свабода” (www.svabdoa.org)