У Свіслачы адзначаць Дзень памяці паўстанцаў 1863 г.

27 кастрычніка ў Свіслачы пройдуць мерапрыемствы, прысвечаныя Дню памяці паўстанцаў 1863 г.

Дзень памяці на свіслацкай зямлі, радзіме Кастуся і Віктара Каліноўскіх, будзе адзначацца дэмакратычнай супольнасцю ўжо ў трынаццаты раз.

У праграме Дня памяці малебен ў мясцовым касцёле, урачыстае ўскладанне кветак да помнікаў героям паўстання Кастусю Каліноўскаму і Рамуальду Траўгуту, наведванне вёскі Якушоўка, дзе захаваліся парэшткі падмуркаў сядзібы Каліноўскіх, побач з якой у 1997 г/ актывістамі дэмакратычнага руху быў усталяваны памятны крыж, канцэрт.

На Дзень памяці паўстанцаў 1863 г. ў Свіслач штогод з’язджаецца ўсё большая колькасць людзей. Свіслач, адзіны населены пункт у Беларусі, дзе ўсталяваны помнік Кастусю Каліноўскаму. На мясцовых могілках пахаваны старэйшы брат Кастуся Віктар, які лічыцца ідэйным натхняльнікам нацыянальна-вызвольнага руху ў Беларусі ў другой палове ХІХ ст.

Магіла Віктара Каліноўскага была адшуканая на свіслацкіх могілках у 1996 г. гарадзенскім журналістам Зміцерам Кісялём і мясцовымі актывістамі дэмакратычнага руху. На магіле быў усталяваны помнік, а месца пахавання добраўпарадкавана. З таго часу адзначэнне Дня памяці паўстанцаў у Свіслачы сталася традыцыйным.

Усім ахвотным узяць удзел у Дні памяці паўстанцаў 1863 г., які пройдзе ў Cвіслачы 27 кастрычніка, можна звяртацца на адрас: zasvabodu.hrodna@gmail.com

Паводле “Нашай Нівы” (www.nn.by)