In Вільня veritas

Зборнік лірыкі маладых беларускіх паэтаў “In Вільня veritas” (“Ісціна ў Вільні”) прэзентаваны ў музеі Максіма Багдановіча 3 кастрычніка. Прэзентацыя зладжаная ў межах паэтычнага фестывалю “Парадак словаў”, які адбываецца ў Беларусі ад 2 па 7 кастрычніка.

Выхад кніжкі стаўся вынікам паэтычнага конкурсу, які ладзіў беларускі ПЭН-цэнтр да стагоддзя газеты “Наша Ніва”. Куратары праекту – крытык Ганна Кісліцына і паэт Андрэй Хадановіч.

Андрэй Хадановіч ў часе адкрыцця прэзентацыі расказаў пра аўтараў зборніку: “Вельмі сімпатычная, як на мяне, кагорта не толькі паэтаў, але і празаікаў. Збольшага беларускамоўных, але і тых, хто піша па-руску: пераможцы Рэспубліканскага конкурсу “Стагоддзе “Нашай Нівы”.

З 80-ці дасланых аўтараў журы абрала 22 ўдзельнікі з Мінску, Віцебску, Магілёву, Мазыра, Крупак, Брэста і інш. Імёны фіналістаў: Кірыл Дубоўскі, Сяргей Карбановіч, Алесь Кудрыцкі Настасся Манцэвіч, Сяржук Мядзведзеў, Андрэй Пакроўскі, Сірошка Пістончык і Уласік Смаркач (псеўданімы), Віталь Рыжкоў, Аляксей Сарока, Ганна Серахан, Сяржук Семянюк, Наталка Харытанюк, Юлія Шэдзько, Віктар Ываноў, Юлія Яфімовіч, Андрэй Адамовіч і Віялета Пачкоўская.

Прысутныя на імпрэзе у музеі Максіма Багдановіча сталіся першымі, хто пабачыў зборнік “In Вільня veritas” у Мінску, які толькі выйшаў з друкарні.

Паводле Радыё “Свабода” (www.svaboda.org) і “Нашай Нівы” (www.nn.by)