Збор сродкаў на крыж А. Сыса

Помнік на магіле Анатоля Сыса да трэцяе гадавіны смерці паэта збіраецца паставіць скульптар Генік Лойка. Камень ужо замоўлены, але на выраб бракуе грошай.

“Я добра ведаў Анатоля, ён лічыў мяне сябрам, – кажа скульптар. – Мы былі знаёмыя з тых часоў, калі ён быў у “Тутэйшых”, а я – у “Талацэ”. У мяне ёсць скульптура, якую я зрабіў тады для “Тутэйшых”: “Вянок маладым беларускім паэтам”, цяпер яна захоўваецца ў музеі Багдановіча”. І самому А. Сысу Г. Лойка некалі падарыў невялікую скульптуру “Страцім-лебедзь”. “Памятаеце ягоны верш, – кажа скульптар. – А ты, Страцім, адзін у евангельскім небе Радзімы... Ты ляці. Не глядзі, ты ж прывык да азёр у ільдзінах”.

Г. Лойка ўжо ствараў помнікі дзеячам культуры. Напрыклад, Міхасю Стральцову, Міхалу Дубянецкаму. Яго помнік А. Сысу – стылізаваны крыж з барэльефам паэта ў цэнтры. Зверху справа ў цярновым гняздзе прымасцілася птушка, што сімвалізуе сабой “салаўінае сэрца” Беларусі. У ніжняй частцы крыжа – надпіс “Сыс Анатоль” з пазнакай году нараджэння і смерці паэта.

Апроч Г. Лойкі, у конкурсе, зладжаным аргкамітэтам па ўшанаванні памяці паэта, бралі ўдзел скульптары Алесь Шатэрнік, Леў і Сяргей Гумілеўскія.

Помнік будзе з чорнага граніту (габро-дыябазу), вагою недзе 800 кг. Камень ужо замоўлены на заводзе «Белгран», што ў менскай Дражні.

“Спачатку яго мусяць разрэзаць, і мы перавязем яго да мяне ў майстэрню, – кажа сп. Лойка. – Менавіта на аплату паслуг заводу і транспарціроўку патрэбныя грошы – усяго паўтара мільёна рублёў. Потым пачнецца ужо менавіта мая праца”.

Па словах сябра аргкамітэту, паэта Эдуарда Акуліна, усталяванне і адкрыццё помніку плануецца да трэцяй гадавіны з дня смерці А. Сыса – у траўні 2008 г. у вёсцы Гарошкаў.

Сродкі на выраб і ўсталяванне помніка можна перадаць, звярнуўшыся па т.: (017) 284-44-04, 768-56-14 (Эдуард), (029) 955-92-04 (Генік).

Паводле “Нашай Нівы” (www.nn.by)