З 1 красавіка змененыя правілы атрымання літоўскіх візаў

З 1 красавіка змененыя правілы атрыманні літоўскіх віз для грамадзян Беларусі – зараз яны павінны дакументальна пацвярджаць сваю фінансавую заможнасць.

Як паведаміла літоўская амбасада ў Мінску, для атрымання аднаразовай візы без запрашэння грамадзянам Беларусі, якія выязджаюць у Літву на тэрмін да 30 дзён, акрамя поліса медыцынскага страхавання неабходна прадставіць пацвярджэнне наяўнасці фінансавых сродкаў на тэрмін знаходжання ў Літве з разліку 40 еўра ў дзень. Гэта можна зрабіць шляхам асабіста падпісаных дарожных чэкаў і іх копій, даведкі з банка аб наяўнасці сродкаў або выпіскі з рахунку крэдытнай карткі. Тым, хто выязджае па запрашэннях, пацверджаным дэпартаментам міграцыі пры МУС Літвы, пацвярджаць наяўнасць грашовых сродкаў не патрабуецца.

Для атрымання шматразовай візы грамадзяне Беларусі, а таксама грамадзяне іншых краін, якія маюць дазвол на пражыванне ў Беларусі, зараз павінны звяртацца толькі ў консульскую службу Літоўскай Рэспублікі ў межах акругі, дзе яны пражываюць. Такім чынам, з гэтага часу амбасада Літвы ў Мінску не будзе абслугоўваць жыхароў Брэсцкай і Гарадзенскай абласцей.

Запрашэнне для афармлення візы не патрабуецца для чальцоў сем'яў асобаў літоўскага паходжання, якія выязджаюць разам; чальцоў сем'яў асобаў, што захавалі права на грамадзянства Літоўскай Рэспублікі; асобаў, якія маюць права на часовае і сталае пражыванне ў дзяржавах Еўрасаюза.

Запрашэнне таксама не патрабуецца для асобаў, чые грамадзянскія правы адноўленыя па законе Літоўскай Рэспублікі "Аб аднаўленні правоў асобаў, рэпрэсаваных за супраціў акупацыйным рэжымам", і чальцоў іх сем’яў, якія выязджаюць з імі. У гэтым выпадку неабходна прадставіць даведку аб тэрміне асуджэння, зняволенні, ссылкі або іншага абмежавання волі. Запрашэнне таксама не трэба для тых, каму на праве ўласнасці належыць зарэгістраванае ў Літве памяшканне памерам не меней 14 квадратных метраў жылой плошчы: аднапакаёвая жылы дом, яго частка, кватэра або іншае жылое памяшканне, прызначанае для пражывання асобы або сям'і.

На такіх жа ўмовах могуць выязджаць чальцы сям'і, калі на кожнага з іх маецца 14 квадратных метраў жылой плошчы. Паводле новых правілаў у запрашэнні не маюць патрэбы асобы ва ўзросце 65 гадоў і старэй і тыя, хто выязджае для наведвання месцаў пахаванняў блізкіх сваякоў на тэрыторыі Літвы на тэрмін да 10 дзён (два разы на працягу года пры наяўнасці дакумента, які пацвярджае захаванасць магілы).

Акрамя таго, з 1 красавіка спыняецца выдача групавых віз. Падаваць дакументы на атрыманне літоўскай візы трэба не раней чым за тры месяца да меркаванай паездкі ў Літву.

Дадзеныя змены звязаныя з падрыхтоўкай да ўступлення Літвы ў шэнгенскую зону, растлумачылі БелаПАН у літоўскай амбасадзе.

naviny.by