Рэзалюцыя да Дня Волі прынятая ў Нью-Йорку

Падчас урачыстага сходу ў гонар 89-й гадавіны абвяшчэння незалежнасці БНР сябры Беларуска-амерыканскага задзіночання ўхвалілі спецыяльную рэзалюцыю.

“Нью Ёрк, 25 сакавіка 2007 году

Мы, беларусы і сябры беларускай грамады Амэрыкі, што сабраліся сёньня, у сьвяты для нас дзень абвешчаньня Незалежнасьці Беларускай Народнай Рэспублікі, сьведчым сваю адданасьць ідэалам Акту 25 Сакавіка 1918 году, сваю вернасьць свабодзе, незалежнасьці й дэмакратыі ў Беларусі, беларускай мове і культуры.

Мы заяўляем, што сёньня існуе рэальная пагроза страты незалежнасьці Беларусі. Нас не ўводзяць у зман дэкляратыўныя заявы дыктатара Лукашэнкі пра ягоную “абарону” беларускай незалежнасьці. Менавіта Лукашэнка сістэматычна і мэтанакіравана ствараў і стварае ўмовы для страты незалежнасьці Беларусі дзеля сваіх прыватных мэтаў.

Мы асуджаем імпэрыялістычную палітыку Расеі ў адносінах да Беларусі, і ейную падтрымку Лукашэнкі праз палітычныя й эканамічныя каналы, датацыі й крэдыты.

Мы ўхваляем прынцыповую паставу Ўраду і Кангрэсу Злучаных Штатаў па беларускім пытаньні, асуджэньне імі тэрору і рэпрэсіяў у Беларусі, падтрымку беларускай незалежнасьці, дэмакратыі, беларускай мовы і культуры.

Мы ўважаем, што менавіта павага да беларускай мовы і актыўнае ўжываньне яе, вывучэньне і шанаваньне сваёй культуры – ёсьць падставай для найбольш поўнага ажыцьцяўленьня дэмакратычных свабодаў і правоў асобы ў Беларусі.

Мы патрабуем ад антынароднай дыктатуры Лукашэнкі спыніць этнацыд беларускага народу, спыніць перасьлед беларускай мовы і беларускага школьніцтва на беларускай зямлі. Мы патрабуем таксама спыніць гандаль незалежнасьцю і небясьпечную гульню ў такзваную “саюзную дзяржаву” з Расеяй.

Мы заклікаем беларусаў на чужыне і ўсіх людзей добрай волі як у ЗША так і па ўсім сьвеце падтрымаць змаганьне беларускага народу супраць прамаскоўскай дыктатуры, кантактаваць свае ўрады і парляманты, узьнімаць свой голас у абарону свабоды, незалежнасьці, дэмакратыі, нацыянальнай мовы і культуры ў Беларусі.

Мы выказваем салідарнасьць са сваімі братамі й сёстрамі на Бацькаўшчыне, і шлем свае вітаньні змагарам за вольную і дэмакратычную Беларусь у сям’і эўрапейскіх народаў”.

Інфармацыю даслаў Віталь Зайка