Лёс Вікі Мароз абмеркавалі ў Мілане

Сёння ў Мілане праваабарончая асацыяцыя “Сябры дзяцей” правяла першыя публічныя дэбаты, прысвечаныя лёсу Вікі Мароз ды іншых беларускіх сіротаў, якім, паводле ўдзельнікаў імпрэзы, адмоўлена ў праве на сям’ю. У рамках дэбатаў адбылася прэзентацыя кнігі “Марыя і дзеці разладу. Выпадак у Кагалета”.

У дэбатах узялі ўдзел прадстаўнікі шырокіх колаў італьянскай грамадскасці — юрысты, універсітэцкія выкладчыкі, псіхолагі, журналісты, сем’і, якія дагэтуль штогоду прымалі ў сябе дома беларускіх дзяцей-сірот.

Усе яны згодныя: драматычная гісторыя Вікі Мароз, пра якую апавядаюць аўтары новай кнігі, не адзінкавая. Галоўнае на сёння пытанне: “Што трэба зрабіць, каб гэтыя няшчасныя дзеці-сіроты не з’яўляліся надалей падставай для міждзяржаўнага разладу?”

У часе імпрэзы прадстаўнікі італьянскіх сем’яў выказалі занепакоенасць у тым, што беларускія сіроты ў выніку рашэння ўладаў зноў не прыедуць — цяпер ужо на велікодныя вакацыі.

“Мы ўсе некалькі месяцаў шмат гаварылі пра беларускую дзяўчынку, аднак рэальна так нічога і не зрабілі, — заявіў прэзідэнт асацыяцыі “Сябры дзяцей” Марка Графіні. — Сённяшнімі дэбатамі мы хочам прыцягнуць увагу да парушэння права беларускіх сірот жыць у сям’і”.

Паводле Радыё “Свабода” (www.svaboda.org)