Сцяг Полацка ўздымуць на Эверэсце

Сцяг Полацка і капсулу з зямлёй са Спаса-Еўфрасіннеўскага манастыра альпіністы ўздымуць на самую высокую гару ў свеце — Эверэст. Гэтая ідэя належыць Сяргею Батуру, па паходжанні — беларусу, сёння— расійскаму бізнесоўцу. Ён нарадзіўся ў Полацку, а цяпер жыве ў Прыморскім краі.

На пачатку красавіка група альпіністаў, у складзе якой будзе і Сяргей Батура, запланавала пад’ём на самую высокую кропку зямной паверхні. Адным з вынікаў гэтай экспедыцыі і будзе ўздым полацкага сцяга над Эверэстам і закладка капсулы з зямлёй з манастыра на вяршыні гары.

Полацкі манастыр заснавала Еўфрасіння Полацкая — святая, што лічыцца нябеснай заступніцай Беларусі. Днямі ў Полацкім гарвыканкаме сцяг горада і капсулу з зямлёй афіцыйна перадалі былому земляку.

Паводле Еўрапейскае радыё для Беларусі
(www.belradio.fm)