Памёр знаны польскі пісьменнік і журналіст Рышард Капусьцінскі

Вядомы польскі пісьменнік з беларускімі каранямі — Рышард Капусьцінскі — памёр у аўторак 23 студзеня ў шпіталі Медыцынскай Акадэміі ў Варшаве. Ён доўгі час знаходзіўся ў гэтым шпіталі, паведамляе “Газета Выборча”. У пятніцу перанёс аперацыю, а ў аўторак здарыўся абшырны інфаркт сэрца. Па дадзеных BBC News, ён не перанёс аперацыі на сэрцы, а аглядальнік The New York Times лічыць, што прычынай смерці стаў рак, якім Капусьцінскі быў хворы ўжо некалькі гадоў.

Рышард Капусьцінскі нарадзіўся ў сакавіку 1932 г. у Пінску, у доме на вуліцы Балотнай (сёння Суворава, 43) у сям’і вясковых настаўнікаў. Пазней ён прызнаваўся, што так ахвотна наведваў найбяднейшыя краіны таму, бо ў іх было нешта ад Палесся.

Капусьцінскі скончыў Варшаўскі ўніверсітэт і атрымаў ступень па гісторыі. Яго першым месцам службы была моладзевая газета “Sztandar Mlodych”, адкуль яго звольнілі за смелы рэпартаж пра новы сталеплавільны завод. Пазней за гэты артыкул яму прысудзілі “Залаты крыж”.

У 1981 годзе Капусьцінскі далучыўся да руху “Салідарнасць” і пазбавіўся працы ў афіцыйнай прэсе, але ён пісаў эсэ для замежных выданняў, у тым ліку, для амерыканскіх газет і часопісаў.

Ён здабыў вядомасць як пісьменнік-падарожнік і майстар рэпартажу. Працаваў у “Палітыцы”, “Культуры”, а таксама як карэспандэнт Польскага прэсавага агенцтва (PAP) у Афрыцы, Лацінскай Амерыцы і Азіі. Быў сведкам заняпаду манархій ў Эфіопіі ды Іране, пра што напісаў кнігі “Цэзар” і “Шах-ін-Шах”. Гэтыя раманы і адкрылі Капусьцінскаму шлях на заходні рынак. Пра пісьменніка захоплена пісалі Джон ле Карэ, Норман Мэйлер, С’юзан Сонтаг.

Сёлета Капусьцінскі быў намінантам на літаратурную прэмію Нобеля. Ягоныя шансы букмекерскай канторай Ледброкс расцэньваліся як 5:1. Вышэйшы рэйтынг меў толькі Архан Памук (5:2), які і атрымаў прэмію.

“Адзін Капусьцінскі варты тысяч скуголячых і фантазіруючых пісак”, — напісаў Салман Рушдзі.

Паводле “Нашай Нівы”,
“Хартыі 97”, lenta.ru