Кіраўнік ПАСЕ: наша задача — наводзіць масты

Напярэдадні свайго візіту ў Беларусь кіраўнік Парламенцкай асамблеі Савета Еўропы Рэнэ ван дэр Ліндэн адказаў на пытанні журналістаў. У прыватнасці, ён адрэагаваў на папярэднюю ацэнку візіту, якую даў Аляксандр Мілінкевіч у інтэрв’ю БелаПАН.

Паводле Мілінкевіча, візіт высокага еўрапейскага палітыка будзе пададзены афіцыйнымі медыямі ў Беларусі на карысць рэжыму і можа быць негатыўна ўспрыняты тымі, хто з рэжымам нязгодны. На думку Мілінкевіча, папярэдняй умовай такога візіту магло б стаць вызваленне палітычных вязняў у Беларусі.

Ван дэр Ліндэн: “Я абмяркоўваў умовы перад маім ад’ездам і той жа спадар Мілінкевіч раней казаў, што гэты візіт без сумневу важны. Я цытую яго. Я абмяркоўваў гэтае пытанне з многімі людзьмі з недзяржаўных арганізацый у Беларусі, прадстаўнікамі апазіцыі, сябрамі Парламенцкай асамблеі Савета Еўропы, прадстаўнікамі Рады Еўропы і ўрэшце прыняў рашэнне ехаць, таму што Парламенцкая Асамблея здольная наводзіць масты, нават калі масты напачатку даволі хісткія. Гэта наша роля. Гэты ж падыход я бачу ў Савета Еўропы.

З гэтай прычыны я еду ў Беларусь і мая ўмова, больш ці менш выкананая, што я магу гаварыць з апазіцыяй афіцыйна. У маёй праграме таксама сустрэча з прадстаўнікамі грамадзянскай супольнасці, недзяржаўных арганізацый, студэнтамі. І гэта залежыць толькі ад мяне, пра што і як я буду гаварыць. Я таксама сустрэнуся з жонкай аднаго са зняволеных. Я буду сустракацца з кіраўніцтвам праваслаўнай і каталіцкай царквы”.

Кіраўнік ПАСЕ ў інтэрв’ю “Свабодзе” таксама заявіў, што ён не плануе абмяркоўваць аднаўленне для Беларусі статусу спецыяльна запрошанай у Парламенцкай асамблеі, бо для гэтага не выкананыя умовы, аднак Ван дэр Ліндэн не выключыў, што разгляд гэтага пытання магчымы ў будучым.

Паводле радыё “Свабода”