Цэнзура расійскіх тэлеканалаў у Беларусі

Навіны тэлеканала “Россия” ў апошнія дні сталі ісці ў Беларусі роўна на гадзіну пазней за звычайны час. Калі раней беларусы глядзелі расійскія навіны ў 13.00, 16.00 і 19.00 па менскім часе, гэта значыць адначасова з расейцамі, то цяпер навіны ідуць у 14.00, 17.00 і 20.00. Адпаведна – на гадзіну пазней за Расію (нагадаем, што паміж Беларуссю і Расіяй розніца ў часе – 1 гадзіна). Супрацоўнік аднаго з расійскіх тэлеканалаў у інтэрв’ю прэс-цэнтра Хартыі’97 выказаў здагадку, што такім чынам беларускія ўлады стварылі сабе люфт для таго, каб у выпадку неабходнасці цэнзураваць расейскія навіны.

На меркаванне расійскага журналіста, неабходнасць “адсочваць” расійскія навіны ўзнікла ў сувязі з тым, што ў апошні час на расійскіх тэлеканалах шмат крытыкуюць беларускія улады. Крыніца нагадала, што ў канцы снежня ў Беларусі з праграмы вяшчання тэлеканала НТВ была “выразана” праграма Уладзіміра Салаўёва “К барьеру!”, прысвечаная беларуска-расійскаму газаваму канфлікту.

Летась навіны тэлеканала НТВ ужо цэнзураваліся. З прычыны крытычнага сюжэту пра сітуацыю ў Беларусі замест вячэрняга выпуску праграму “Сегодня” паказалі ў запісы дзённы блок навін.

Расійскія тэлеканалы, нагадаем, даўно ідуць у Беларусі ва “ўрэзаным выглядзе”. За іх трансляцыю ў Беларусі адказвае Белтэлерадыёкампанія, якая фармуе сетку вяшчання расійскіх тэлеканалаў па свайму меркаванню.

Паводле Хартыя’97