Мілінкевіч не правёў ні воднай сустрэчы з выбаршчыкамі ў Гомельскай вобласці

У сувязі з тым, што аўтамабіль лідэра апазіцыі тройчы затрымлівала міліцыя, былі сарваныя ўсе сустрэчы Мілінкевіча з выбаршчыкамі. Нагадаем, што экс-кандыдат у прэзідэнты наведвае рэгіёны Беларусі і праводзіць сустрэчы з выбаршчыкамі, бо з’яўляецца даверанай асобай кандыдатаў у дэпутаты мясцовых саветаў.

Аднак у суботу, шостага студзеня, лідэру беларускай апазіцыі не давялося прысутнічаць ні на воднай сустрэчы з выбаршчыкамі ў Гомельскай вобласці.

Як паведаміў БелаПАН адзін з кіраўнікоў гомельскай абласной арганізацыі Аб’яднанай грамадзянскай партыі Уладзімір Кацора, які суправаджаў Аляксандра Мілінкевіча ў паездках па рэгіёну, супрацоўнікі ДАІ тройчы затрымлівалі аўтамабіль, у якім ехаў А. Мілінкевіч.

Каля вёскі Парычы Светлагорскага раёна аўтамабіль лідэра беларускай апазіцыі быў спынены першы раз. Супрацоўнікі Дзяржаўтаінспекцыі, затрымалі аўтамабіль, і спрабавалі абвінаваціць кіроўцу і Аляксандра Мілінкевіча, што яны знаходзяцца ў стане алкагольнага ап’янення. У сувязі з гэтым Аляксандр Мілінкевіч, які збіраўся на сустрэчу з выбаршчыкамі, быў дастаўлены разам з кіроўцам у мясцовы фельшарска-акушэрскі пункт і ў раённую лякарню Светлагорска. Праз дзве гадзіны Аляксандр Мілінкевіч змог працягнуць паездку, але не паспеў на сустрэчу з выбаршчыкамі, якая павінна была праходзіць у Рэчыцы.

Пасля гэтага аўтамабіль лідэра апазіцыі спынілі па дарозе ў Гомель. Супрацоўнікі ДАІ сказалі Аляксандру Мілінкевічу, што на аўтамабілі, у якім ехаў экс-кандыдат у прэзідэнты, было здзейсненае дарожна-транспартнае здарэнне.

А. Мілінкевіч адмовіўся затрымлівацца ў аддзяленне міліцыі, бо палічыў сябе невінаватым. У сваю чаргу супрацоўнікі міліцыі выклікалі АМАП для затрымання лідэра апазіцыі. Разгляд справы працягваўся каля двух гадзін, пасля чаго Аляксандр Мілінкевіч быў адпушчаны, але ўжо не паспеў на чарговую сустрэчу з выбаршчыкамі.

У 20 км ад Гомеля аўтамабіль А. Мілінкевіча ізноў быў спынены. Па словах супрацоўнікаў ДАІ, Аляксандр Мілінкевіч не быў прышпілены рамянямі бяспекі. Праз гадзіну Аляксандра Мілінкевіча адпусцілі, аднак лідэр апазіцыі спазніўся на сустрэчу з выбаршчыкамі ў Гомель. Не змог сустрэцца з выбаршчыкамі ён і ў Добрушы па прычыне спазнення.

Паводле БелаПАН і
by.milinkevich.org