Фіктыўны Саюз Беларусі і Расіі

Старшыня Рады па знешняй і абароннай палітыцы Расіі Сяргей Караганаў перакананы, што Саюзная дзяржава Расіі і Беларусі — гэта фікцыя. Па меркаванні Сяргея Караганава, які з’яўляецца таксама намеснікам дырэктара Інстытута Еўропы РАН, “ніякага будаўніцтва Саюзнай дзяржавы не адбываецца”.

“Чым раней мы пачнем праводзіць цвёрдую эканамічную палітыку ў дачыненні рэжыму, тым лепш. Хоць гэта трэба было зрабіць гадоў на пяць таму”, — заявіў Сяргей Караганаў у інтэрв’ю агенцтву “Росбалт”.

Напярэдадні гэтай заявы Сяргей Караганаў падкрэсліў у інтэрв’ю штотыднёвіку “Белгазета”, што “Расія ўжо зараз цалкам расчаравалася ў сваіх надзеях на канструктыўнае ўзаемадзеянне з беларускім кіраўніцтвам”.

Па меркаванню Сяргея Караганова, пытанне ў тым, ці будзе Расія “ціснуць палітычна і эканамічна” рэжым у Беларусі. “Калі так, то змена ўлады (у Беларусі) адбудзецца трошкі хутчэй і ў больш або менш рэгуляваных формах. Калі ціснуць не будзе, калі Крэмль працягне стомлена субсідзіраваць рэжым, той самы рэжым, які атрымоўвае вялікую частку эканамічных выгадаў ад перапрацоўкі расійскай нафты, не абкладзенай мытнымі пошлінамі, і ад таннага газу, тады справа зацягнецца. Можа дайсці да сацыяльнага выбуху”, — лічыць старшыня Рады па знешняй і абароннай палітыцы Расіі.

Пры гэтым Сяргей Караганаў дадаў, што як Расія, так краіны Заходняй Еўропы не робяць значных крокаў у бок таго, каб змяніць палітычную сітуацыю ў Беларусі. “Нярэдка мы бачым, што трагічны лёс Беларусі выкарыстаюць у сваіх мэтах асобныя палітычныя кругі Польшчы і іншых краін. Я не бачу істотнай дапамогі Беларусі са боку Захаду”, — сказаў Сяргей Караганаў.

Паводле “Росбалт”,
“Белгазета” і
telegraf.by