Мілінкевіч і лідэры краін Еўрасаюза

Лідэр аб’яднаных дэмакратычных сіл Беларусі Аляксандр Мілінкевіч прымае ўдзел у з’ездзе Еўрапейскай Народнай Партыі (ЕРР), які сёння праходзіць у мястэчку Мэйзэ, недалёка ад Бруселя. З’езд ЕРР з’яўляецца сустрэчай на высокім узроўні кіраўнікоў дзяржаў і ўрадаў 10 з 25 краін Еўрасаюза і лідэраў апазіцыі тых краін, дзе кіруюць правацэнтрысцкія партыі.

У праграме візіту Аляксандра Мілінкевіча запланаваны шэраг як пратакольных, так і неафіцыйных сустрэч з кіраўнікамі еўрапейскіх краін і кіраўніцтвам ЕРР.

З’езд праходзіць напярэдадні саміту Еўрапейскага саюза, які 14 снежня пачне сваю працу ў Бруселі. Галоўнай тэмай саміту стане абмеркаванне перспектыў пашырэння Еўрасаюза. Ад таго, якую пазіцыю зойме ў гэтым і іншых пытаннях ЕРР, найболей уплывовая еўрапейская партыя, будзе залежаць далейшая ўнутраная і знешняя палітыка Еўрасаюза.

У З’ездзе ЕРР прымаюць удзел канцлер Нямеччыны Ангела Меркель, прэм’ер-міністр Нідэрландаў Ян-Петэр Балканендэ, прэм’ер-міністр Грэцыі Костас Караманліс, федэральны канцлер Аўстрыі Вольфганг Шусель, прэм’ер-міністр Люксембурга Жан-Клод Юнкер, прэм’ер-міністр Швецыі Фрэдрык Рэйнфельд, прэм’ер-міністр Мальты Лоурэнс Гонзі, прэм’ер-міністр Славеніі Янэз Дрнаўшэк, прэм’ер-міністр Латвіі Айгарс Калвіціс, і старшыня Еўрапейскай камісіі Жазэ-Мануэль Бароза, акрамя таго лідэры правацэнтрысцкіх партый Францыі — Нікаля Сарказі, Бельгіі — Жо Вандэурзэн, Нямеччыны — Эдмунд Штойбер, Партугаліі — Луі Маркес Мендэс і Эстоніі — Таві Вескімагі, прэзідэнт Румыніі Траян Басэску, прэм’ер-міністр Харватыі Іва Санадэр, прэм'ер-міністр Албаніі Солі Берыша.

Еўрапейская Народная Партыя (ангел. European People's Party, EPP) — найбуйнейшая еўрапейская палітычная партыя. Заснаваная ў 1976 годзе. ЕРР — “гэта аб’яднанне палітычнага цэнтра, чые карані ляжаць у глыбіні гісторыі еўрапейскай цывілізацыі. Яна аб’ядноўвае нацыянальныя партыі з блізкай ідэалогіяй у краінах-чальцах і асацыяваных чальцах ЕС, а таксама падтрымлівае блізкія кантакты з краінамі — верагоднымі кандыдатамі”.

У ЕРР уваходзяць або з’яўляюцца асацыяванымі чальцамі 42 правацэнтрысцкія партыі з 37 краін Еўропы, з іх 17 партый як назіральнікі. Статут назіральнікаў маюць і дзве беларускія партыі — Партыя БНФ і АГП.

Вынікі выбараў у Еўрапарламент у 2004 годзе забяспечылі кааліцыі ЕРР-ЕD адносную большасць у Еўрапарламенце — 264 з 732 дэпутацкіх месцаў. Новым прэзідэнтам Еўрапейскага парламента з 1 студзеня 2007 года стане кіраўнік фракцыі ЕРР-ЕD у Еўрапарламенце — Ганс-Герт Потэрынг.

Менавіта ЕРР-ЕD аднагалосна вылучыла лідэра аб’яднаных дэмакратычных сіл Беларусі Аляксандра Мілінкевіча на атрыманне ўзнагароды Еўрапарламента імя Андрэя Сахарава.

Паводле naviny.by