ТБК Літвы правяло святочную імпрэзу

25 лістапада гэтага года Таварыства беларускай культуры Літвы адзначыла слаўную дату беларускай гісторыі — Слуцкі Збройны Чын, альбо Дзень Герояў.

Зала ТБК была ўпрыгожаная плакатамі аб гераічным учынку беларускіх патрыётаў, якія пайшлі паміраць у 1920 годзе, каб жыла Беларусь. Сябра ТБК Алесь Адамковіч цікава распавёў аб прычынах і падзеях Слуцкага паўстання. Андрусь Старавойтаў праспяваў патрыятычныя песні, прысвечаныя гэтай даце.

У другой частцы імпрэзы адбылася прэзентацыя кнігі “Галасы разбуджаных птушак” беларускага краязнаўцы і гісторыка Міхася Казлоўскага. Рэцэнзію да кнігі зрабіла Леакадзія Мілаш. Аўтар напісаў і выдаў вельмі цікавую, насычаную фактычным матэрыялам, праўдзівую кнігу, прысвечаную памяці людзей, якія пры ўсіх акупацыях верна служылі справе беларускага адраджэння, але якім сёння ў Беларусі не знайшлося не толькі месца, але і належнай павагі да іх памяці.

Пры поўнай залі, людзі не хацелі разыходзіцца і жадалі яшчэ слухаць змястоўны аповед самога аўтара, за кубкам кавы яшчэ доўга абмяркоўвалі слаўную дату нашай гісторыі, яе лепшых сыноў і дачок, а таксама дзякавалі аўтару за каштоўную кнігу.

Грамада ТБК падтрымала ідэю аб зборы грошаў для аўтара на выданне наступнай кнігі.

Хведар Нюнька