Дэмакратычныя выбары ў Польшчы

12 лістапада 2006 г. у Польшчы адбудуцца мясцовыя выбары (у мясцовыя структуры самакіравання). У іх актыўны ўдзел прымаюць і Беларусы Польшчы (прадстаўнікі нацыянальнай меншасці). Спрыяльнай умовай для іх удзелу ў выбарах з’яўляецца той факт, што беларусы жывуць кампактна — на паўднёва­ўсходняй тэрыторыі Беласточчыны, а па закону “аб нацыянальных меншасцях” пад час мясцовай выбарчай кампаніі можна нават выкарыстоўваць афіцыйную мову нацменшасці ў СМІ.

На час выбараў беларусамі Польшчы арганізавана тры выбарчыя камітэты, якія займаюцца вылучэннем кандыдатаў. Гэта:

• Беларускі Выбарчы Камітэт (БВК), сфарміраваны ў Беластоку; ад яго вылучаецца 29 кандыдатаў у рады Горада Беласток, а ў соймік Падляшскага ваяводства — 19 кандыдатаў;

• Беларуска-Народны Выбарчы Камітэт (БНВК), сфарміраваны ў Гайнаўцы, вылучае 40 кандыдатаў на раду горада Гайнаўка, у рады гайнаўскага павету — 32 кандыдата, у рады гмінаў у Гайнаўскім павеце — 53 кандыдаты, а таксама 4 кандыдата на войтаў гмін.

• Бельская Кааліцыя (выбарчая кааліцыя беларускіх арганізацый і Саюза Украінцаў Падляшша ў Бельшчыне) вылучае 32 кандыдата ў рады бельскага павету, 70 кандыдатаў у рады гмінаў, аднаго кандыдата на пасаду бурмістра і двух — на войтаў.

Апрача беларусаў, якія ідуць ад беларускіх камітэтаў і кааліцыі, гэта вядомыя ў грамадстве Сакрат Яновіч, Яўген і Антон Мірановічы, Алег Латышонак, Яўген Вапа, Міхась Андрасюк, Андрэй Сцепанюк, Славамір Іванюк, Яўген Сашко і яшчэ шмат іншых, ёсць беларусы, якія самастойна знайшлі сабе месца ў спісах польскіх выбарчых камітэтаў, да прыкладу, Янка Сычэўскі. Усе яны падкрэсліваюць сваю беларускасць і спадзяюцца на падтрымку беларускай дыяспары.

Шчыра жадаем ім усім поспеху!

Інфармацыйны цэнтр МГА “ЗБС “Бацькаўшчына”,
паводле інфармацыі ад Яўгена Янчука