Мітынг у падтрымку “Новага Жыцця”

Мітынг пад лозунгам “Шчаслівы народ, у якога Гасподзь ёсць Бог” у падтрымку царквы “Новае жыццё” адбыўся 21 кастрычніка а 18.00 гадзіне ў мінскім парку “Сяброўства народаў” у раёне пл. Бангалор. На ім прысутнічала каля двух тысяч чалавек. У мітынгу прынялі ўдзел вернікі Аб’яднання хрысціян поўнага Евангелля, Саюза хрысціян веры Евангельскай, а таксама людзі, якія вырашылі выказаць сваю салідарнасць з царквой.

Вернікі Мінска і іншых гарадоў Беларусі, а таксама госці з Расіі вышлі на пляц Бангалор з патрабаваннем адмяніць рашэнне Мінгарвыканкама аб пазбаўленні царквы “Новае жыццё” будынкі і дазволіць яго перапрафіляванне ў культавае. На транспарантах былі напісаныя лозунгі: “Удзельнікі акцыі за царкву “Новае Жыццё”, “Спыніць хлусню аб царкве на СТБ”, “Грэх верыць хлусні, правярай інфармацыю СМІ”, “Хрысціяне Расіі падтрымліваюць хрысціян Беларусі”, “У Богу наша сіла” і іншыя.

Мітынг распачаўся выступам старэйшага пастара царквы “Новае Жыццё” Вячаслава Ганчарэнкі. Ён сцісла распавёў прысутным аб тым, чаму царква актыўна выступіла з патрабаваннямі да ўлад і пачала акцыю “Пост-галадоўка”: “Правёўшы незлічоныя дні і ночы ў малітвах і пастах аж да гэтага дня, мы атрымалі веру ад Бога абараніць праўду і аднавіць справядлівасць у дачыненні да нас. Мы прынялі рашэнне, што не аддамо наш будынак і будзем абараняць свае правы любой цаной”.

Аб тым, што не толькі “Новае Жыццё” сутыкнулася з беззаконнем улад, адзначаў пастар мінскай царквы “Ісуса Хрыста” Барыс Чарнаглаз: “Шкада, але ў нашай краіне несправядлівае стаўленне да евангельскіх вернікаў стала заканамернасцю”.

І шмат у чым ціску на евангельскія цэрквы спрыяе дзеючы ў нашай краіне закон “Аб волі сумлення і рэлігійных арганізацыях”, які абмяжоўвае волю вернікаў. Таму на мітынгу гучалі патрабаванні пачаць працэс вынясення змен у дзеючы закон, з улікам інтарэсаў усіх рэлігійных канфесій Беларусі, а таксама ўжо існуючага досведу дзеяння гэтага закона. “Мы гатовыя ўдзельнічаць у гэтым, гатовыя да дыялогу з уладамі на аснове прызнання нашых правоў і ўзаемнай павагі”, – адзначалі выступоўцы. З такімі патрабаваннямі ў канцы мітынгу яго ўдзельнікамі была прынятая рэзалюцыя.

На акцыі выступіў таксама чалец рады біскупаў Саюза хрысціян веры Евангельскай Сяргей Паднюк. Ён таксама выказаў словы падтрымкі з патрабаваннямі прытрымлівання канстытуцыйных правоў царквы “Новае Жыццё”. А ўдзельнікі паста-галадоўкі падчас мітынгу зачыталі свой зварот да ўсіх прысутных.

Зварот галадаючых да ўдзельнікаў мітынгу
ў падтрымку патрабаванняў царквы “Новае Жыццё”

“Мы прыйшлі сюды, таму што пачулі заклік Божы ў сваім сэрцы. Прыйшлі таму, што ў краіне не выконваецца Закон, зневажаюцца Запаветы Божыя, і нават чалавечыя законы, напісаныя людзьмі для людзей. Царква вычарпала ўсе юрыдычныя сродкі абараніць праўду, абараніць сваё законнае права, права валодаць зямлёй і будынкам на гэтай зямлі, дзе вернікі пакланяюцца Богу і служаць Яму”, – адзначаецца ў звароце. Таму адзінае, што застаецца людзям, – гэта пост, пакора перад Богам і малітва да Яго аб прабачэнні для народа Беларусі. “Сёння ў царквы адымаюць, крадуць будынак. Усяго толькі адзін будынак? Усяго толькі ў адной царквы? Не!!! Гэтае ўзаконенае зладзейства, якое працягваецца ўжо некалькі пакаленняў. Краіна дзесяцігоддзямі губляла цэрквы. У вернікаў адымалі дамы, саборы і храмы, адымалі магчымасць збірацца і маліцца. Грэх памнажаўся і рос, а народ маўчаў і мірыўся з гэтым. Парушалася не толькі гэтая запаведзь, але ўсё астатнія. Пара спыніць эскалацыю граху і павініцца за свае грахі і грахі бацькоў”, – гаворыцца ў звароце ўдзельнікаў акцыі паста-галадоўкі ў абарону царквы “Новае Жыццё”.

Паводле www.newlife.by