Беларускія каровы ўцяклі ў Польшчу

Незвычайная гісторыя гэтымі днямі здарылася на беларуска-польскай мяжы — мяжу нелегальна перайшоў (пераплыў па рацэ Буг) вялікі статак беларускіх кароваў. “Імігрантак” з-за іх супраціву не ўдалося адправіць назад у Беларусь такім самым спосабам — цяпер яны чакаюць аўтатранспарту з беларускага боку.

Статак з 242 беларускіх кароваў, якія пасвіліся на лузе непадалёк ад мяжы, падышоў да ракі Буг, па якой праходзіць беларуска-польская мяжа, каб напіцца. Паводле сведак, раптам каровы пачулі як мычыць карова на польскім баку мяжы і, нібыта падпарадкоўваючыся нейкаму загаду, кінуліся ў ваду і хутка пераплылі раку, апынуўшыся на польскай тэрыторыі каля гарадка Янаў Падляшскі, што паміж Тэрэспалем і Семятычамі.

Пабачыўшы такі дэсант, польскія і беларускія памежнікі, а таксама пастух з польскага боку мяжы абсалютна разгубіліся.

На дапамогу прыйшлі супрацоўнікі Янаўскага коннага заводу, дзе гадуюцца таксама і каровы — беларускіх кароваў, як сказаў кіраўнік заводу Марэк Трэля “у межах міжнароднай салідарнасці надбужанскіх земляробаў” накармілі і паставілі ў хлявы. Нечаканых гасцей агледзеў польскі ветэрынар.

Спадар Трэля, аднак, падкрэсліў, што не ўхваляе такіх формаў іміграцыі і хацеў бы, каб каровы як мага хутчэй вярнуліся ў Беларусь.

Спроба загнаць жывёл назад у ваду, каб яны пераплылі Буг у адваротным накірунку, скончылася правалам — каровы наадрэз адмовіліся нават увайсці ў ваду. На Янаўскім конным заводзе чакаюць, пакуль беларускі бок прышле за імі грузавікі.

У сераду ўвечары імігранткі яшчэ заставаліся ў Польшчы.

Паводле www.naviny.by