Дзень салідарнасці ў Беларусі

У Мінску затрымана каля дзесятка чалавек
16 кастрычніка, у Мінску было затрымана каля дзесяці чалавек, якіх адвезлі ў дзяжурную часць міліцыі Цэнтральнага раёна Мінска. Юнакоў і дзяўчат затрымалі ў той момант, калі яны запалілі свечкі ля ўваходу ў метро на станцыі “Няміга”. Байцы спецназу міліцыі затрымалі яшчэ некалькіх чалавек на вуліцы, у якіх былі на заплечніках значкі “За Свабоду!”.

Разагнаная акцыя ў Салігорску
Пяць актывістаў дэмакратычнага руху затрыманыя: Ілля ды Іван Шылы, Аляксей Валабуеў, Дзяніс Карноў і Аліна Таранік.

Некалькі дзесяткаў людзей сабраліся на цэнтральнай плошчы горада, а частка планавала прайсці шэсцем ад мясцовага рынка па цэнтральнай вуліцы Леніна і далучыцца да тых, хто на плошчы. Па сведчанні Аляксея Валабуева, ніякіх абвінавачванняў людзям не выстаўлялі, а затрымлівалі “дзеля высвятлення асобаў”. Таксама салігорскі актывіст паведаміў, што з некаторымі з тых, хто планаваў удзельнічаць у акцыі, міліцыянты абыходзіліся жорстка.

У Гомелі затрымана каля паўтара дзесяткі чалавек
У Гомелі, 16 кастрычніка, а 21.00, супрацоўнікі Цэнтральнага райаддзела міліцыі затрымалі каля паўтара дзесятка пераважна студэнтаў і школьнікаў, у іх ліку тры дзяўчыны. Ля помніка Кірылу Тураўскаму ў цэнтры горада моладзь ладзіла акцыю салідарнасці “Запалі свечку”.

Як паведаміў адзін з удзельнікаў акцыі, спадар Зміцер, міліцыянты патлумачылі юнакам і дзяўчатам, што яны затрыманы дзеля высвятлення асобаў.

Дзень Салідарнасці ў Магілёве і Бабруйску
У Магілёве з нагоды Дня салідарнасці грамадскія актывісты правялі адразу некалькі акцый, у ходзе якіх нагадалі гараджанам пра зніклых палітыкаў ды зняволеную з палітычных матываў моладзь. Група грамадскіх актывістаў, трымаючы перад сабой іхныя партрэты, у суправаджэнні міліцыянтаў, некалькі разоў прайшла па пешаходнай вуліцы Ленінскай. Тым часам сябры незарэгістраванага “Маладога фронту” ў ходзе акцыі перад будынкам аблвыканкама, ля помніка Леніну, пакінулі партрэты зняволеных “маладафронтаўцаў”.

Вечар Дня Салідарнасці ў Магілёве быў адзначаны таксама вывешваннем перад будынкам абласнога КДБ бел-чырвона-белага сцягу, раскідваннем улётак з дахаў дамоў ды запальваннем традыцыйных свечак памяці. А ў Бабруйску ля капліцы перад могілкамі грамадскія актывісты запалілі свечкі памяці.

Брэст: масавыя затрыманні ў Дзень салідарнасці
14 чалавек былі затрыманыя і дастаўленыя ў міліцыю ўвечары 16 кастрычніка падчас акцыі, якая была прымеркаваная да Дня салідарнасці.

Актывісты кампаніі “За свабоду” выйшлі да Кобрынскага моста і стварылі на ягоных сходах ланцуг. Удзельнікі акцыі трымалі на грудзях вялікія літары, з якіх складаўся лозунг “Свабоду палітвязням!”.

Прыблізна праз дваццаць хвілінаў да месца падзеяў прыехала патрульная машына. Удзельнікам акцыі загадалі разысціся. Моладзь рушыла ў бок вуліцы МОПРа, запаліла свечкі і паспрабавала стварыць кола, але ў гэты час міліцыянты пачалі затрымліваць актывістаў.

У пастарунку затрыманыя знаходзіліся да позняга вечара. Ніякіх пратаколаў на іх не складалі. Міліцыянты патлумачылі свае дзеянні неабходнасцю высветліць асобы людзей, што бралі ўдзел у акцыі.

Усе затрыманыя пад час адзначэння Дня салідарнасці адпушчаныя

Паводле радыё “Свабода”