Міліцыя вызваліла Паўла Красоўскага

У нядзелю, 15 кастрычніка, у шэсць гадзін вечара, міліцыя адпусціла затрыманага па падазрэнні ў арганізацыі выбухаў у Віцебску і забойствах з згвалтаваннем апазіцыйнага актывіста “Маладога фронту” Паўла Красоўскага. Следства не змагло падаць пераканаўчых доказаў вінаватасці і па заканчэнні 10 сутак адпусціла апазіцыянера.

На ўсіх допытах у Віцебскім кіраванні па барацьбе з арганізаванай злачыннасцю Павел Красоўскі адмаўляў абвінавачванні ў здзяйсненні крымінальных дзеянняў. Аднак афіцыйныя абвінавачванні з моладзевага актывіста пакуль не знятыя.

“Гэтыя абвінавачванні супраць Паўла Красоўскага настолькі вар’ятныя, што нават няма сэнсу іх каментаваць”, — заявіў адвакат Паўла Красоўскага Павел Сапелка.

“Я назваў бы гэта новым этапам барацьбы з палітычнымі апанентамі. Калі раней ім абавязвалі палітычныя артыкулы, то зараз апазіцыянераў сталі вінаваціць у забойствах, арганізацыі выбухаў, згвалтаваннях. Такім чынам улады спрабуюць дыскрэдытаваць апазіцыянераў у вачах грамадства”, — заявіў на праваабаронца Валянцін Стэфанавіч.

Сам Павел Красоўскі, ў інтэрв’ю для радыё “Свабода” расказаў:

— Усё да апошняй хвіліны трымалася ў сакрэце. Я не ведаў, вызваляць мяне ці не. Ведаў толькі, што падыходзіць тэрмін. І ім трэба альбо абвінавачанне супраць мяне выстаўляць, альбо адпускаць. Але да апошняй хвіліны нават адвакаты не былі ўпэўненыя, што мяне адпусцяць. Я так разумею, што з мяне дагэтуль падазрэнне не знятае. Узялі падпіску пра тое, што я буду прыходзіць на ўсе допыты. Па першым выкліку прыязджаць у Віцебск, у пракуратуру. І калі буду змяняць месца жыхарства, таксама павінен паведамляць.

Павел Красоўскі адразу назваў падазрэнні следчых абсурднымі ды паказаў ім пашпарт, дзе было пазначана, што падчас леташніх віцебскіх выбухаў ён знаходзіўся ў Польшчы.

— Я думаў, што гэта маё жалезнае алібі, але яны высунулі супраць мяне падазрэнне і затрымалі за забойства. Артыкул 139 частка 3. Фактычна гэта “расстрэльны” артыкул. Я быў у шоку, нават не памятаю, як падпісваў розныя паперкі, знаёміўся з правамі. Потым, недзе на пятыя суткі, яны высунулі яшчэ два забойствы з сексуальнымі дамагальніцтвамі. Тады я ўжо зразумеў, што гэта нейкая такая гульня, каб выбіць мяне з каляіны. Я гэта ўспрыняў больш адэкватна. Яны мяне гэтым артыкулам нават павесялілі.
Мне падавалася, што гэта нейкі эксперыменты, якія яны ставяць, адпрацоўваюць нейкія новыя тэхналогіі. Псіхалагічны прэсінг адчуваўся вельмі моцны. Вытрымаць гэта мне дазваляла толькі тое, што на волі падтрымка. Бачыў, што людзі падыходзяць да гэтага шостага аддзелу, дзе мяне дапытвалі.

Паўлу Красоўскаму пакуль не вярнулі пашпарт і мабільны тэлефон, спаслаўшыся на тое, што яны патрэбныя для следчых дзеянняў. Павел кажа, што ўдзячны ўсім, хто ўвесь гэты час дамагаўся ягонага вызвалення.

Паводле радыё “Свабода” і telegraf.by