Візіт Івонкі Сурвіллы ў Латвію

Старшыня Рады БНР Івонка Сурвілла ў межах сваёй паездкі па краінах Балтыі наведала сталіцу Латвіі Рыгу.

Падчас візіту спадарыня Івонка Сурвілла мела сустрэчу з намеснікам дзяржсакратара Міністэрства замежных спраў Латвіі Эдгарам Скуя. У гонар старшыні Рады БНР у МЗС Латвіі ладзілі абед. Пры сустрэчы абмяркоўваліся пытанні вонкавай палітыкі Латвіі ў дачыненні да Беларусі і існуючыя праблемы беларускай меншасці ў Латвіі. Падчас размовы латвійскі бок прадэманстраваў добрую інфармаванасць у пытаннях сённяшняй сітуацыі ў Беларусі і вялікую зацікаўленасць дзейнасцю Рады БНР. Абодва бакі выказаліся наконт надзвычай вялікай карысці і неабходнасці далейшых сустрэч.

Спадарыня Івонка Сурвілла наведала таксама Рыжскую беларускую асноўную школу, дзе адбылася сустрэча з настаўнікамі.

Увечары ў каміннай залі дома Асацыяцыі нацыянальна-культурных таварыстваў Латвіі падчас сустрэчы з сябрамі Латвійскага таварыства беларускай культуры “Свiтанак” спадарыня Івонка Сурвілла распавяла аб дзейнасці Рады БНР, а таксама аб жыцці беларускай дыяспары ў Канадзе і ў тых краінах, дзе яна пабывала з візітамі. Пасля спадарыня Івонка адказала на шматлікія пытанні “cвітанкаўцаў”.

На здымках: падчас сустрэч у МЗС і ў старой Рызе

Латвійскае таварыства беларускай культуры “Світанак”
www.svitanak.lv