Піліп Орлік — украінскі гетман беларускага паходжання

У Беларусі выйшаў у свет зборнік навукова-папулярных артыкулаў аб жыцці і дзейнасці Піліпа Орліка — украінскага гетмана, беларуса па паходжанні.

Матэрыялы ў кнізе прадстаўленыя на трох мовах — беларускай, украінскай і рускай. Яе прэзентацыя адбудзецца 10 кастрычніка ў амбасадзе Украіны ў Беларусі напярэдадні святкавання 334-летніх угодкаў са дня нараджэння Піліпа Орліка, якія адзначаюцца 11 кастрычніка. У мерапрыемстве прымуць удзел і аўтары зборніка — беларускія і ўкраінскія навукоўцы, якія прадстаўляюць Нацыянальныя Акадэміі Навук і ВНУ дзвюх краін, паведаміў прэс-сакратар амбасады Украіны ў Беларусі Леанід Ясінскі.

Ён таксама заўважыў, што зараз ідзе праектаванне памятнага знака Піліпу Орліку, які будзе ўсталяваны ў сяле Касута Вілейскага раёна Мінскай вобласці. Над праектам працуе вядомы беларускі архітэктар Уладзімір Тарноўскі. Як чакаецца, памятная шыльда будзе ўсталявана на 20-тонай каменнай камлызе, якая будзе знакам моцы беларускай зямлі, здольнай нараджаць такіх тытанаў думкі і духу як Піліп Орлік. Працу над знакам плануецца завяршыць да 11 кастрычніка 2007 года — у гэты дзень будзе святкавацца 335 угодкі ўкраінскага гетмана.

Сярод планаў мясцовых улад: стварэнне капліцы-музея роду Орлікаў на тэрыторыі Петрапаўлаўскай царквы, пабудаванай у сяле Касута яшчэ ў 1863 годзе. Гетман Піліп Орлік стаў аўтарам “Пактаў і Канстытуцыі законаў і вольнасцяў Войска Запарожскага”. Шматлікія даследчыкі лічаць гэтую Канстытуцыю першай у свеце канстытуцыяй у сучасным разуменні гэтага тэрміна. Прынятыя 5 красавіка 1710 года ў Бэндэрах (Малдова) “Пакты і Канстытуцыі” не толькі рэгулявалі адносіны паміж гетманам і казацкім старшынёй, але і канстытуцыянавалі ўнутранае ўпарадкаванне дзяржавы. Па меркаванні спецыялістаў, сфармуляваныя Піліпам Орлікам ідэі парламентарызму актуальныя і дагэтуль.

Паводле belarustoday.info