Віленскія Дні беларускай і літоўскай культуры

У нядзелю, 8 кастрычніка, у Вільні завяршыліся “Дні нацыянальнай беларускай і літоўскай культуры”, прысвечаныя стагоддзю першай беларускай газеты “Наша Ніва”.

У імпрэзах прынялі ўдзел літоўскія парламентарыі Вацлаў Станкевіч і Ёнас Чэкуоліс, кіраўнік дэпартаменту нацыянальных меншасцей пры літоўскім урадзе Антанас Пятраўскас. Былы прэм’ер-міністар Літвы Альгірдас Бразаўскас забяспечыў фінансавую падтрымку.

У ліку беларускіх удзельнікаў былі Станіслаў Шушкевіч; Ірына Казуліна; Алесь Аркуш — журналіст, аўтар “Нашай Нівы” з 1993 г.; Сяргей Харэўскі — намеснік галоўнага рэдактара газеты “Нашай Нівы”; Радзім Гарэцкі — прафесар, акадэмік; Алег Трусаў — старшыня ГА “Таварыства беларускай мовы імя Ф.Скарыны”; Генадзь Бураўкін і Сяргей Законнікаў — пісьменнікі; Алесь Пушкін і Мікола Купава — беларускія мастакі.

Таксама прысутнічалі вядомыя беларусы з замежжа: Івонка Сурвіла — Прэзідэнт Рады БНР (Канада); Сяргей Навумчык — намеснік старшыні Рады БНР (Чэхія); Янка Барысевіч — старшыня суполкі беларусаў Мельбурна (Аўстралія); Таццяна Казак — старшыня Латвійскага таварыства беларускай культуры “Світанак”; Юрка Станкевіч — старшыня Дэмакратычнага Форуму Еўропы, заснавальнік суполкі “Пагоня” (Чэхія); Алена Міхалюк — старшыня Згуртавання беларусаў Вялікай Брытаніі; Павел Шаўцоў — сябра Згуртавання беларусаў Вялікай Брытаніі; Ігар Шаховіч — старшыня Калінінградскага рэгіянальнага грамадскага аб’яднання “Беларускае таварыства культуры” (Расія); Яўген Янчук — старшыня Беларускага Дэмакратычнага Аб’яднання ў Гайнаўцы (Польшча).

У нядзелю ў віленскай ратушы адбыліся канцэрты і выставы кніг і мастацкіх твораў, прайшлі дыскусіі. Запамінальнымі былі выступленні Віктара Шалкевіча, гурта “Стары Ольса”. Пад час дыскусій абмяркоўвалася магчымасць выдання беларуска-літоўскага і літоўска-беларускага слоўнікаў, кніг па гісторыі Літвы, зробленых літоўскімі аўтарамі па-беларуску, і гісторыі Беларусі, напісанай беларусамі па-літоўску, выданняў па гісторыі Вільні і Віленскага універсітэту.

Удзельнікі Дзён культуры сабраліся з розных краін свету, каб удыхнуць водар сваёй Бацькаўшчыны, узгадаць блізкае і роднае сэрцу пад час культурных праграм, але ў дыскусіях на культурную тэматыку ўзнікалі пытанні і сацыяльныя, і палітычныя, якія найбольш моцна хвалююць беларусаў у свеце.

Тэзісы асноўных выступаў у бліжэйшы час чытайце на нашым сайце.

Інфармацыйны цэнтр МГА “ЗБС “Бацькаўшчына”