Шоў Мадонны было без Лукашэнкі

Учорашняе шоў амерыканскай поп-зоркі Мадонны ў Маскве прайшло без чаканага аншлагу. Каб убачыць скандальную зорку, на стадыён “Лужнікі” прыйшло крыху больш за 50 тысяч гледачоў — прычым, служба бяспекі арэны разлічвала на 75 тысяч наведнікаў.

Адбыліся неістотныя змены і ў самой праграме Мадонны. Перадусім, было цікава, як успрыме маскоўская публіка відэарад да песні “Sorry”. У часе папярэдніх выступаў у рамках еўрапейскага турнэ пад “праклёны”, што спявачка адрасавала “брудным” палітыкам, на вялізным экране адзін аднаго змянялі выявы дыктатараў і прыхільнікаў аўтарытарнага стылю кіравання. Сярод “абраных” аказаўся прэзідэнт Беларусі Аляксандр Лукашэнка.

Аднак, як апавядаюць гледачы, у Маскве Мадонна адзначылася паліткарэктнасцю і ня стала ўскладняць адносіны з гаспадарамі. Лейтматывам візуальнага суправаджэння кампазіцыі “Sorry” сталі асобы, датычныя да пачатку ваенных дзеянняў ці абвінавачаныя ў генацыдзе — Франка, Мусаліні, Гітлер, Сталін, Мугабэ, Пол Пот, Піначэт, Фідэль Кастра, Садам Хусейн, паўночнакарэйская дынастыя Кімаў, нават старэйшы і малодшы Бушы.

Аднак на развітанне спявачка не ўстрымалася ад невялікай лекцыі: маўляў, Расея вось ужо пятнаццаць гадоў дэмакратычная краіна, таму ўсе тут мусяць быць свабодныя і вольна выказваць свае думкі. З чым усе і пагадзіліся.

Дарэчы, анансаваная сустрэча Мадонны з сям’ёй Уладзімера Пуціна не адбылася.

Паводле радыё “Свабода”
svaboda.org