Сіўчык ў спецпрёмніку на Акрэсціна

Затрыманы напярэдадні ў Мінску апазіцыйны палітык Вячаслаў Сіўчык знаходзіцца ў спецпрыёмніку-размеркавальніку па вуліцы Акрэсціна. Аб гэтым БелаПАН паведаміў дзяжурны спецпрыёмніка.

У.Сіўчык быў затрыманы 12 верасня прыкладна ў 21.20 у сталічным кафэ “Бамонд” у цэнтры горада, дзе ён гутарыў з журналістам Паўлюком Быкоўскім.

Маці палітыка Галіна Сіўчык выказала БелаПАН здагадку, што яе сын мог быць затрыманы па абвінавачванні, якое было вынесенае яму 19 траўня. Тады спадар Сіўчык быў завочна асуджаны беларускім судом да 10 сутак адміністрацыйнага арышту.

У.Сіўчык — адзін з актыўных удзельнікаў намётавага лагеру на Кастрычніцкай плошчы Мінска, які ўзнік пасля прэзідэнцкіх выбараў 19 сакавіка і праіснаваў тры дня — да ліквідацыі праваахоўнымі органамі.

Палітыка тады затрымалі на плошчы ўвечар 23 сакавіка і даставілі ў аддзяленне хірургіі 3-й клінічнай лякарні Мінска, паколькі падчас затрымання ён быў збіты (дыягназ — чэрапна-мазгавая траўма сярэдняга цяжкасці). 29 сакавіка яму ўдалося пазбегнуць затрымання пасля выпіскі з лякарні.

Некалькі месяцаў спадар Сіўчык знаходзіўся на тэрыторыі Украіны, дзе займаўся палітычнай дзейнасцю.

БелаПАН