Сталічная мэрыя дазволіла правядзенне “Джынсавага фэста”

Акцыя з назвай “Джынсавы фэст” пройдзе з 16.00 да 20.00 у Парку сяброўства народаў, недалёка ад пляца Бангалор, 16 верасня. Па словах намесніка старшыні Партыі БНФ Віктара Івашкевіча, “Джынсавы фэст” — акцыя салідарнасці з палітвязнямі і пацярпелымі ад ціску ўлад актывістамі апазіцыі. Для ўдзельнікаў акцыі арганізатары запланавалі рок-канцэрт.

Пры гэтым, Віктар Івашкевіч выступаў у якасці аднаго з арганізатараў акцыі і быў здзіўлены, чаму сталічныя ўлады прынялі рашэнне санкцыянаваць апазіцыйную акцыю.

“Я не магу зразумець логіку ўлад, чаму яны дазволілі “Джынсавы фэст”. Магчыма, гэта звязана з тым, што інфармацыя аб гэтай акцыі ўжо пайшла ў народ. І яны зразумелі, што лепш дазволіць правесці санкцыянаванае мерапрыемства, чым чакаць, як усё скончыцца 16 верасня”, — выказаў здагадку ў інтэрв’ю БелаПАН Віктар Івашкевіч.

Намеснік старшыні партыі БНФ, аднак, дадаў, што ў беларускіх рэгіёнах мясцовыя ўлады па розных прычынах забараняюць правядзенне вулічных акцый, арганізатарам якіх выступаюць апазіцыйныя актывісты.

Дазволіўшы правядзенне “Джынсавага фэста” на плошчы Бангалор, Мінгарвыканкам пры гэтым забараніў правядзенне заяўленай дэманстрацыі па маршруце кінатэатр “Кастрычнік” — плошча Незалежнасці – вуліца Сурганава – парк Сяброўства народаў, бо гэта “створыць перашкоды для пешаходнага і транспартнага руху ў раёне вышэйназваных вуліц”. Адпаведны ліст заяўнікі акцыі “Джынсавыага фэсту” Павел Юхневіч, Аляксей Шыдлоўскі і Віктар Івашкевіч атрымалі з Мінгарвыканкаму за подпісам намесніка старшыні Мінгарвыканкама Міхаіла Ціцянкова.

Паводле telegraf.by