Заўтра ёсьць учора
“Згуртаванне беларусаў
свету “Бацькаўшчына” выдала кнігу Кастуся Акулы “Заўтра ёсьць учора”. Раман
з’яўляецца 15 кнігай з серыі “Бібліятэка Бацькаўшчыны”, якая была заснавана ў
2004 годзе.
Гэта вострасюжэтны раман
вядомага пісьменніка напісаны ў Канадзе для канадыйскага чытача. Аўтар
распавядае аб складаным лёсе беларускай жанчыны на фоне гістарычных падзей у
Беларусі часоў Другой сусветнай вайны. Гераіня рамана Марыя Каравай, страціўшы
сваю сям’ю і цудам выжыўшы пасля двух расстрэлаў – і немцамі, і партызанамі, –
урэшце рэшт воляй лёсу апынулася ў Канадзе, дзе сустракае забойцу сваёй сям’і.
Вера і бязвер’е, хрысціянская пакорлівасць, і барацьба за волю, міласэрнасць і
помства – тыя адвечныя маральныя дылемы, якія даводзіцца вырашаць Марыі, як і
ўсяму яе народу, і якія ня страцілі сваёй актуальнасці для яго і па
сёння.
“Заўтра ёсьць учора” –
адзіны англамоўны твор аўтара, які ў 1968 годзе з’яўляўся лепшым бестселерам у
Канадзе. Выданне з’яўляецца асаблівым для Беларусі. Па-першае, гэта другое
выданне К. Акулы на Беларусі, першым быў раман “Змагарныя дарогі” выдадзены ў
1994 годзе. Па-другое, гэта першае беларускамоўнае выданне рамана “Заўтра ёсьць
учора”. Па-трэцяе, гэта аўтарызаваны пераклад: Ірына Варабей узгадняла з
Кастусём Акулам перакладзены раман. На жаль, аўтар не дачакаўся выхаду кнігі ў
друк у Беларусі, ён памёр 29 студзеня 2008 года ў Таронта.
Вось што ў прадмове да
кнігі напісала Ірына Варабей: “Раман напісаны на мове таго народа, сярод якога і
прыйшлося хавацца ад тых кашмараў. Трэба сказаць, што, напэўна, стаў
пачынальнікам новага жанру, хаця сам пра гэта і ня думаў”.
Выданне кнігі стала магчыма
дзякуючы намаганням Ірына Варабей (Канада), Вользе Качан (Аўстралія) і Ірэне
Калядзе-Смірновай (ЗША).
Кніга выйшла невялікім
тыражом, усяго 500 асобнікаў, таму ўсім прыхільнікам творчасці Акулы варта
паспяшацца ў набыцці кнігі.
Заўтра ёсьць учора :
раман / Кастусь Акула ; пер. з ангельскай, прадм. Ірыны Варабей. – Мінск :
Медисонт, 2008. – 200 с. – (Бібліятэка Бацькаўшчыны ; кн.
15).
Інфармацыйны цэнтр МГА
“ЗБС “Бацькаўшчына”
| 
